Ertegi keıipkerleri men sıqyrly sandyq. Almatyda Prezıdenttik shyrsha qalaı ótti
Almatyda dástúrli «Tańǵajaıyp Jańa Jyl» atty Prezıdenttik jańa jyldyq shyrsha ótip, 400 bala qatysty. Olardyń qatarynda jetim, ata-anasynyń qamqorlyǵynsyz qalǵan, az qamtylǵan jáne kópbalaly otbasylar men erekshe bilim berý qajettiligi bar balalar, sondaı-aq oqýda, sportta jáne shyǵarmashylyqta jetistikke jetken daryndy balalar da boldy, dep habarlaıdy aqshamnews.kz
Memleket basshysy Qasym-Jomart Toqaevtyń atynan qonaqtardy Almaty qalasynyń ákimi Erbolat Dosaev quttyqtady.
Ertegi keıipkerleri – Olaf pen jańa jyldyq Buǵy merekelik atmosferany ornatty. Olar balalarmen birge qyzyqty saıahatqa attanyp, kvestterden ótip, jumbaqtardy sheshti. Basty maqsat - qupıa sandyqtyń sıqyrly kiltterin tabý edi. Barlyq qupıany ashyp, sandyqty ashqan soń balalar Abaı atyndaǵy Qazaq ulttyq opera jáne balet teatry artıseriniń oryndaýyndaǵy «Shelkýnchık» ertegilik qoıylymyna tap boldy. Bul qoıylym merekeniń sharyqtaý shegi edi.
«Búgin biz sıqyrly ǵajaıyptyń bir bóligine aınaldyq, bul kóńil-kúıdi anımatorlar men qyzyqty tapsyrmalar bar baıqaýlar syılady. Ásirese, maǵan sıqyrly sandyqty ashý úshin kilt izdegen qatty unady. Sandyqty ashyp, onyń ishin kórý úshin birigip, jumbaqtardy tez sheshýimiz kerek boldy. Bul óte qyzyqty oıyn boldy, keı tapsyrma qıynǵa soqty, biraq biz bárin birge sheshtik. Bul kún mende umytylmas áser qaldyrdy», – dedi №17 mektep-ınternatynyń oqýshysy Talshyn Qudusova.
Merekelik baǵdarlama aıasynda Aıaz Ata men Aqshaqardyń dástúrli baıqaýlary ótti. Al kesh sońynda balalarǵa tanymal artıs SADRADDIN «Pesná» atty jańa jyldyq ánin oryndap berdi.
«Maǵan ertegi álemine engendeı áser qaldyrdy, barlyq jerde ǵajaıyp atmosfera sezildi! Biz úshin jyldamdyqty, tapqyrlyqty jáne batyldyqty synaıtyn qyzyqty oıyndar men jarystar uıymdastyryldy. Ásirese, maǵan án aıtyp, sıqyrly keıipkerdi oıatyp, ony bıleýge májbúrleıtin raýnd erekshe unady. Sál qıyndaý, biraq óte qyzyqty boldy. Ýaqytymdy keremet ótkizdim, tipti ózimdi ertegi keıipkerindeı sezindim», – dedi №6 arnaıy mektep-ınternatynyń oqýshysy Araı Baıbasarova.
Mereke qonaqtary Qazaqstan Respýblıkasy Prezıdentiniń atynan jańa jyldyq syılyqtar aldy.