Qorǵanys mınıstri taǵy bir qyzmetke taǵaıyndaldy
QR Qorǵanys mınıstri Rýslan Jaqsylyqov Qazaqstannyń sporttyq jáne jaýyngerlik sambo federasıasynyń basshysy bolyp saılandy.
Rýslan Jaqsylyqovtyń kandıdatýrasyna federasıanyń barlyq músheleri biraýyzdan daýys berdi. Ol bul qyzmetke Aıdos Aqjanovtyń ornyna keldi, dep habarlaıdy aqshamnews.kz.
Qoǵamdyq birlestiktiń jańa basshysy Rýslan Jaqsylyqov – dzúdodan KSRO sport sheberi, birneshe dúrkin chempıon, sambo men dzúdodan respýblıkalyq jáne halyqaralyq jarystardyń júldegeri.
«Federasıa múshelerine nátıjeli jumysy men maǵan kórsetken senimi úshin alǵysymdy bildiremin. Sporttyq jáne jaýyngerlik sambo áskerı jáne quqyq qorǵaý qyzmetinde jeke quramdy daıarlaý júıesinde sátti qoldanylady. Biz sporttyń bul túrin, onyń ishinde áskerı-qoldanbaly sport retinde keń kólemde damytýǵa úlken kúsh salamyz», dedi general-polkovnık Rýslan Jaqsylyqov.
Federasıanyń jańa prezıdenti aldaǵy josparyn jarıalady.
«2025 jyly sambo TMD-ǵa qatysýshy memleketter Dostyq armıalarynyń áskerı-sporttyq oıyndarynyń baǵdarlamasyna jáne Qazaqstan Qarýly kúshteriniń spartakıadasyna engiziledi. Sondaı-aq jastarǵa áskerı-patrıottyq tárbıe berý maqsatynda keshendi sporttyq is-sharalar, onyń ishinde QR Qorǵanys mınıstriniń kýbogyna sambodan ashyq respýblıkalyq týrnır ótkizý josparlanǵan. Baýyrjan Momyshuly atyndaǵy Almaty áskerı-sport kolejinde sambo bólimshesin ashý josparda bar. Onda kóp balaly otbasylar, áskerıler men aýyl jastarynyń balalaryna artyqshylyq beriledi. Sporttyń bul túrin jappaı damytý maqsatynda Qarýly kúshter qataryna jaýyngerlik sambodan maman-nusqaýshylardy shaqyramyz», dedi federasıa prezıdenti.
Aımaqtyq federasıalar da damıtyn bolady. Búginde 1100-diń ústindegi seksıada qyryq myńnan astam adam sambomen shuǵyldanady.
Halyqaralyq sambo federasıasyna kiretin Federasıa sporttyq jáne jaýyngerlik sambony jappaı damytýǵa, sondaı-aq qazaqstandyq sambısterdiń halyqaralyq jarystarda óner kórsetýiniń nátıjeliligine barynsha kúsh salmaq.