Almaty mańyndaǵy saıajaılardyń birinde sıntetıkalyq esirtki ósiretin iri zerthana joıyldy. Oqıǵa ornynan 22 jasar qyz tutqyndaldy, dep habarlaıdy almaty-akshamy.kz.
Óńir polısıasy men Jetisý oblysy boıynsha UQKD qyzmetkerleri prokýratýranyń úılestirýimen sıntetıkalyq esirtki óndiretin iri esirtki zerthanasyn joıý boıynsha birlesken arnaıy operasıa júrgizgen.
"Jedel-izdestirý is-sharalary barysynda quqyq qorǵaý organdarymen Almaty oblysy İle aýdanynyń aýmaǵyndaǵy saıajaı úıinde sıntetıkalyq esirtkini óndirýmen aınalysqan 22 jastaǵy almatylyq arýdy ustady. Jaýap alý kezinde ol joǵary aqy tólenetin jumysty Telegram kanaly arqyly tapqany belgili boldy", – dep atap ótti Jetisý oblysy PD bastyǵy Sarqytbaı Qusaınov.
Saıajaı úıin tintý kezinde shamamen 44 keli mefedron jáne 2 keli "pırrolıdınovalerofenon – Α-PVP" sıntetıkalyq zaty, esirtki óndirýge qajetti reaktıvter men quraldar, sondaı-aq 28 myń AQSH dollary tabylyp, tárkilengen.
"Quqyq qorǵaý qyzmetkerleri 45 keli astam sıntetıkalyq esirtkini tárkiledi, bul bir ret qoldanatyn 90 myń dozaǵa teń. Onyń quramy tıisti saraptamamen rastaldy. Esirtki zattaryn zańsyz jasaý faktisi boıynsha qylmystyq is qozǵaldy. Kúdikti qamaýǵa alyndy. Tergeý jalǵasýda", – dep túıindedi S. Qusaınov.
Quqyq qorǵaý organdarynyń málimetinshe, esirtki Qazaqstan aýmaǵynda satýǵa arnalǵan.