Amerıkaǵa barǵan 23 qarıanyń eń úlkeni 81 jasta bolsa, eń kishisi alpystan asqan.
Amerıkada óner kórsetken almatylyq qarıalar elge erekshe ásermen oraldy, dep habarlaıdy Almaty-akshamy.kz
Almatylyq "Alataý ardagerler ansambli" Amerıkaǵa at arytyp baryp, qazaqtyń ádet-ǵurpyn, salt-dástúri men ónerin dáriptep keldi. Alataý aýdanynyń aqsaqaldar keńesi qurǵan hor Almaty oblysyndaǵy aýdandardyń bárin aralaǵan.
"Qandaı is-shara bolsa da qalǵan joqpyz. Sporttyq jarystarǵa da qatysamyz. Jeńimpaz atanyp, Astanadaǵy gala konsertte de óner kórsettik. EHRO kórmesi ashylǵanda ulttyq kıimmen baryp, shetelden kelgen qonaqtardyń aldynda óner kórsettik, árqaısysyn qoshemetpen qarsy aldyq", - deıdi Alataý aýdandyq aqsaqaldar keńesiniń tóraǵasy Saǵatýlla Taýbaldy.
Qarıalar shıraq qımyldaıdy. Ónerge de, ómirge de qulshynystary erekshe. Mysaly, 10 sport túri bolsa, sonyń kem degende 6 túrinen qatysady. Jaqynda Amerıkaǵa deıin baryp qaıtty.
"Byltyr qarashanyń 10 kúni aqsaqaldar keńesi jınalyp, shetelge shyǵaıyq dep sheshtik. Qarıalar "Túrkıaǵa baraıyq, Ózbekstanǵa baraıyq" dep jatty. Men Amerıkaǵa baraıyq dep edim, bári ázilge aınaldyrdy. Sóıtip vıza rásimdeýge kiristim. Ońaıǵa soqpady. Alataý aýdany ákiminiń kómegi kóp tıdi. Jaqsynyń jaqsylyǵyn aıtý kerek. Sodan konsýldyqpen, Syrtqy ister mınıstrligimen de sóılestik. Olar Amerıkadaǵy Qazaqstan konsýldyǵynyń telefonyn berdi", - deıdi aqsaqaldar keńesiniń tóraǵasy.
Vızany rásimdeýge Saǵatýlla aqsaqalǵa qyzy kómektesken.
"Hor múshelerine vızany jeke-jeke rásimdeıik dedi. Men oǵan kónbedim. Óıtkeni keıbireýi ótpeı qalýy múmkin. Sodan byltyr jeltoqsan kúttik, qańtar, aqpan kúttik, vıza jasalmady. Bir kúni naýryzda vıza daıyn boldy dedi. Negizi qarttardyń árqaısysynyń bala-shaǵasy kómektesti. Nesıege bolsa da, ata-anamyzdy Amerıkaǵa jiberemiz depti", - deıdi Saǵatýlla ata.
Vızasy daıyn bolǵasyn júregi órekpigen qarttar óz ónerin kórsetetin jerdi konsýldyq arqyly izdeıdi. Alaıda sahna tórin usyna qoıatyn mádenıet oshaqtary bola qoımaıdy.
"Konsýldyqtyń aıtýynsha, zalǵa kórermendi lyq toltyrý qıyn. Óıtkeni ondaǵy qazaqtardyń barlyǵy aqsha tabý úshin barǵan. Ár mınýty esepteýli, ıaǵnı án tyńdaýǵa mursha joq. Sondaı-aq ondaı sahnasy bar zaldardy jalǵa alý da qomaqty qarajat eken. Jeke ózim bastamashy bolǵandyqtan óte qatty ýaıymdadym. Táýligine nebári 3-4 saǵat qana uıyqtaımyn. Namazymdy oqyp, Alladan medet suradym", - deıdi keńes tóraǵasy Saǵatýlla aǵa.
Saǵatýlla aǵa tipti Amerıkadaǵy qazaqtardyń áleýmettik tobyna da qosylady. Hordy sol jerde de nasıhattaıdy.
"Negizi kóbisi eskertý aıtyp, tańǵalysty: "Jastaryń bolsa 70-80-ge keldi. Jolda densaýlyqtaryń syr berse, jaǵdaılaryń ne bolady" dedi. Biraq sheshingen sýdan taıynbas dep kete bardyq. Qarıalar ushaqpen de ushty, 19 qabat alyp kemege de otyrdy, avtobýspen de júrdi. Eshqaısysy densaýlyǵyna shaǵym aıtpady. Kerisinshe barlyǵy qoldady", - deıdi Saǵatýlla Taýbaldy.
12 kún gastróldik saparda 23 qarıa Amerıkanyń eń kórnekti jerlerinde óner kórsetken. Damyǵan memlekettiń keı mádenıeti qarttardyń kózine oǵash bolsa, endi bir kórinisi kóńilinen shyqqan. Halqy kóp shoǵyrlanǵan ataqty alańdarynda qazaqtyń ánurany men ulttyq ánderi shyrqalǵan. Kók týy jelbiregen.
"Nú-Iorktiń "Taıms Skver", "Erkindik músini", "Madam Tússo" alańynda, taǵy basqa halyq kóptep jınalǵan alańdarda óner kórsettik. Maqsatymyz – qazaqtyń ónerin, dástúrin kórsetý edi. Oılaǵan armanymyzǵa jettik dep oılaımyn. Barlyǵy ónerimizdi uıaly telefondaryna túsirip, dý qol shapalaqtap, tánti bolyp jatty. Qarttarymyz da sonaý muhıt asyp, el kórip, jaqsy kóńil-kúıde oraldy", - deıdi Alataý aýdandyq aqsaqaldar keńesiniń tóraǵasy.