Tileýǵalı Satybaldıev áleýmettik jelidegi paraqshasynda ádemi kıim úlgilerin kórsetip, nemerelerimen qyzyqty rolık túsiredi.
Onyń beınejazbalary mıllıonnan asa adamnyń kóńilinen shyqqan. Aqsaqaldyń ózi TikTok-ta tanymal bolamyn, dep oılamaǵan. Tileýǵalı Satybaldıevtyń alǵashqy rolıgi birden kórermenderdiń kóńilin jaýlap alady. Ol kıimdi talǵammen kıedi. 83 jasqa kelse de, tyń, qımylymen de erekshe, dep habarlaıdy Almaty-akshamy.kz 24.kz-ke silteme jasap.
Ol jarty jyldan beri ártúrli beınejazbalar túsirip, paraqshasyna jazylǵan kórermenderin qýantyp júr. Túsirilim men montaj jumystaryna nemereleri kómektesedi eken.
«Ekinshi nemere qyzym ýaqytynda kórkemdik ýchılıshesin bitirgen. Mynany kıińiz, mynany sheshińiz, búıtińiz, súıtińiz dep sol meni osy jelige salyp júrgen. Aldynda "Sizdi bir mıllıon qarapty" dedi, odan keıin "2 mıllıonǵa jetipti" dep qýanyp júrgen. Tańqalyp, odan ári qumar bolyp kettim», - deıdi tıktoker Tileýǵalı Satybaldıev.
Alty aı buryn Tileýǵalı ata óziniń qudaı qosqan jarynan aıyrylyp qalady. Kóńili qulazyp, muńaımas úshin, balalary men nemereleri atalaryna TikTok jelisin úıretipti. Almaty turǵyny bala kezinen sándi kıingendi jaqsy kóretinin aıtady. «Er adamnyń ústindegi kıimi taza ári jarasymdy bolýy kerek», - deıdi.
«Men kıimdi ózim tańdaımyn. Ózime unaǵanyn alamyn, kempirim bolǵan ýaqytta da kóp keńes bergen joq maǵan. "Qoı, men ózim bilemin" deımin. Kishkentaı bala kezimnen jyrtylǵan kıimimdi ózim kelistirip tigip alamyn. Sóıtip óstim ǵoı», - deıdi tıktoker aqsalal Tileýǵalı Satybaldıev.
Aqsaqal: «Maqsatym - tanymal bolý emes, ómirimdi mándi ótkizý», - deıdi. Oǵan qosa nemere, shóberelerine jaqsy tárbıe bergisi keletinin aıtady.