«Atamnyń amanaty» qoǵamdyq birlestigi osy ýaqytqa deıin Uly Otan soǵysy jyldary joǵalyp ketken 1000-nan astam jaýyngerdi tapqan.
Araǵa 80 jyl salyp, eki soǵys ardageriniń súıegi Reseıden Almatyǵa jetkizildi, dep habarlaıdy Almaty-akshamy.kz.
Qan maıdanda jaýmen arpalysyp, Otan úshin qaza bolǵandardyń súıegi túbinde elge jetti. Solardyń biri - Nıkolaı Gýrov Stalıngrad túbindegi shaıqasta atty áskerdi basqaryp, erliktiń úlgisin kórsetken. Alaıda 1942 jyly haty úzilip, habarsyz ketken.
Al Voronej mańynan tabylǵan Tóregeldi Úrkirbaevtyń týystary bolmaǵandyqtan, onyń jerleý rásimin Jambyl aýdany ákimshiligi óz moınyna alǵan.
Qurylǵanyna 3 jyl bolǵan «Atamnyń amanaty» qoǵamdyq birlestiginiń kómegine 5 myńnan astam qazaqstandyq júgingen. Tipti kórshiles Qyrǵyzstan, Ózbekstan, Reseıden týystaryn izdeýshiler kóp habarlasatyn kórinedi. Qyzmetine aqy almaıtyn eriktiler bul mindetin abyroı sanaıdy.
Bıyl elge Uly Otan soǵysyna qatysqan 11 otandasymyzdyń súıegi ákelinip, jer qoınyna tapsyryldy. Bul – balanyń baba aldyndaǵy, tarıh aldyndaǵy mindeti.