Almaty halyqaralyq áýejaıy jańa halyqaralyq jolaýshylar termınalynda alǵashqy jolaýshylaryn qarsy aldy, dep habarlaıdy almaty-akshamy.kz
Almaty halyqaralyq áýejaıy jańa Halyqaralyq jolaýshylar termınalynda alǵashqy jolaýshylaryn qarsy aldy. Bul mańyzdy oqıǵa 2024 jyldyń 1 maýsymynda oryn aldy, alǵashqy reıs retinde Air Astana áýekompanıasynyń KC664 London-Almaty baǵytymen kelgen ushaq saǵat 08:40-ta 94 jolaýshymen qondy.
Jańa termınaldan alǵashqy ushyp ketken reıs te Air Astana áýekompanıasyna tıesili boldy. KC653 Almaty-Doha baǵytyndaǵy reıs saǵat 09:30-da 166 jolaýshymen ushyp shyqty. Jolaýshylardy Almaty halyqaralyq áýejaıynyń basshylyǵy, Almaty qalasynyń ákimdigi jáne Air Astana áýe kompanıasynyń basshylyǵy qarsy aldy.
Almaty halyqaralyq áýejaıynyń prezıdenti Alp Er Týnga Ersoı:
«Bizdiń saıahatymyz 2 jyl buryn QR Prezıdenti Qasym-Jomart Toqaevtyń jańa Halyqaralyq jolaýshylar termınalynyń qurylysynyń bastalýyna oraı kapsýla salýynan bastaldy. Búgin, 2024 jyldyń 1 maýsymynda, biz ýáde etkendeı, alǵashqy reısterdi jańa termınalda qarsy alýdamyz. Búgingi kúnniń kestesi boıynsha jańa termınalda 5 reıs ushyp kelip, 4 reıs ushyp ketedi. Halyqaralyq tájirıbege sáıkes biz barlyq halyqaralyq reısterdi kezeń-kezeńimen jańa termınalǵa kóshiremiz. Halyqaralyq reısterdi tolyǵymen aýystyrý maýsym aıynyń birinshi onkúndiginde júzege asyrylady», - dep málimdedi.
Almaty qalasy ákiminiń orynbasary Álisher Ábdiqadyrov:
«Almaty qalasynyń turǵyndary men qonaqtaryn jańa halyqaralyq jolaýshylar termınalynyń resmı ashylýymen quttyqtaımyn. Endi áýejaı jylyna 14 mıllıon jolaýshyny qabyldaı alady, bul burynǵy kórsetkishten eki ese kóp. Bıylǵy jyly biz jolaýshylar aǵynynyń 11 mıllıon adamǵa deıin ulǵaıýyn kútýdemiz. Almatynyń 41 tikeleı áýe qatynasy men álemniń 82 elimen vızasyz rejımi bar ekenin eskere otyryp, jańa halyqaralyq jolaýshylar termınalynyń ashylýy áýejaı tarıhyndaǵy jańa kezeńdi belgileıtinine senimdimin», - dep atap ótti.
Osy ataýly kúni Almaty halyqaralyq áýejaıy alǵashqy jolaýshylaryn táttilermen jáne estelik syılyqtarmen qarsy aldy. Jańa halyqaralyq termınaldy iske qosýdyń bastapqy merzimi 2024 jyldyń jazynyń sońyna josparlanǵan bolatyn, biraq jolaýshylar aǵynynyń qarqyndy ósýine baılanysty jumys jedeldetilip, termınal alǵashqy reısterdi 1 maýsymnan qabyldaı bastady.
Barlyq halyqaralyq reıster tolyǵymen jańa termınalǵa aýystyrylǵannan keıin, qoldanystaǵy termınal halyqaralyq standarttarǵa sáıkes jańartylyp, ishki reıster úshin paıdalanylady.
Almaty áýejaıynyń jańa Halyqaralyq jolaýshylar termınalyna qosh keldińiz!