Almatyda qys mezgili óz sánimen kelip, qalany appaq qar japqanda, bárinen buryn Almaty zoobaǵynyń aq aıýy Pýrga erekshe shattandy. Sýyqty jaqsy kóretin alyp jyrtqysh úshin bul – naǵyz mereke, dep habarlaıdy Aqshamnews.kz
Tańerteń zoobaq qyzmetkerleri Pýrgamen kezdesýge kelgende, onyń kádimgideı kóńildi ekenin baıqady. Aıý úlken aýlasyn aınalyp júgirip, qarǵa aýnap, tabandarymen appaq untaqqa iz qaldyrdy. Qar qabatyn ıiskep, tipti keı jerin tistep te kórdi.
Pýrga úshin bul jaı sýyq aýa raıy emes, naǵyz oıyn alańy. Ol qardy aldyńǵy tabandarymen kósitip, ústine domalap, óziniń tabıǵı mekenine oralǵandaı kúı keshti. Keıde qardy túıirshik etip jınap, onymen oınaıdy.
Aq aıýlardyń tabıǵattaǵy tirshilik etý ortasy – Arktıka, sondyqtan Almatynyń qarly kúnderi Pýrgaǵa erekshe qýanysh syılaıdy. Jazǵy aptap ystyqta baseın sýynda salqyndap júrse, qysta tabıǵı sýyq aýa raıynyń ózi oǵan keremet jaılylyq ákeledi.
Zoobaq mamandarynyń aıtýynsha, aq aıýlar – naǵyz qar men muzdyń jankúıerleri. Sondyqtan Almatyǵa jaýǵan qar – Pýrga úshin eń keremet tosynsyı boldy.