Almaty qalasy, Almaty jáne Jetisý oblystary boıynsha qylmystyq-atqarý júıesi departamentiniń №72 mekemesinde Halyqaralyq qarttar kúni atalyp ótti.
Meıirim men izgilik merekesi bolyp sanalatyn Qarttar kúninde mekeme ujymy Nurlyhaıat Rysqalıeva men Parıdam Djaparovany quttyqtap, qurmet kórsetti. Nurlyhaıat Rysqalıeva – tergeý ızolátory jedel bóliminiń jedel ýákili bolyp taǵaıyndalǵan alǵashqy qazaq qyzdarynyń biri.
Ol ishki ister organynda 35 jyl qyzmet ótkerip, podpolkovnık shenine deıin jetken maman. Búginde ózi uzaq jyl qyzmet atqarǵan mekemede kitaphanashy bolyp jumys istep, jas urpaqqa úlgi-ónege kórsetip keledi. Nurlyhaıat Júsipqyzy jaýapty qyzmette júrip eki qyz tárbıelep ósirgen aıaýly ana. Tergeý ızolátoryndaǵy taǵy bir eńbegimen el alǵysyna bólengen jan – kapıtan Parıdam Djaparova.
Ol tergeý ızolátorynda uzaq jyldar sottalǵandar arasynda aǵa ınspektor-psıholog qyzmetin atqardy. Parıdam Djaparova qazir qurmetti demalysta bolsa da arnaıy kontıngent arasynda psıhologıalyq jumys boıynsha kásibı qyzmetin jalǵastyrýda. Mereke qurmetine mekemeniń sharýashylyq qyzmetindegi sottalǵandar kóńildi kesh uıymdastyryp, áýelete án shyrqady. Tergeý ızolátorynyń ujymy jas mamandarǵa ózderiniń tyndyrymdy eńbekterimen úlgi bolyp júrgen jandarǵa syılyq tabystap, alǵys aıtty.