«Halyk» qaıyrymdylyq qory Halyqaralyq qarttar kúnine oraı Almaty qalasy Jumyspen qamtý jáne áleýmettik baǵdarlamalar basqarmasyna qaraıtyn «Shańyraq» áleýmettik qyzmet ortalyǵynda merekelik konsert uıymdastyrdy.
Qarıalar aldynda «Mıras» halyqaralyq mektebi, Almaty Halyqaralyq mektebi jáne «Arystan» mamandandyrylǵan lıseıiniń oqýshylary men QR eńbek sińirgen qaıratkerleri Medeý Arynbaev pen Sulýshash Nurmaǵambetova óner kórsetti.
«Biz árdaıym úlkenge qurmet kórsetýdi esten shyǵarmaımyz. «Qarty bar eldiń qazynasy mol» degendeı, bundaı is-sharalar óskeleń jas urpaqqa úlgi bolary sózsiz. "Halyk" qorynyń qoldaýy bul kisilerdiń kóńil-kúıin kóterip, ómir súrýge degen qushtarlyǵyn, kúsh-qýatyn arttyrady degen úmittemiz. Bizdiń maqsatymyz – qarıalarǵa degen ystyq yqylasymyzdy, biz árdaıym ózderimen birge ekenimizdi bildirý», - deıdi Halyk qorynyń dırektory Saǵynbek Shúńkeev.
Mereke sońynda «Halyk» qaıyrymdylyq qory kópbalaly analar men múgedekter qaýymdastyǵyndaǵy kásipkerlerden 305 jastyq pen 305 kórpe satyp alyp, ortalyqtaǵy qarttarǵa syıǵa tartty.
Aıta keteıik, bul is-shara «Halyk» qaıyrymdylyq qorynyń elimizdiń túkpir-túkpirindegi muqtaj jandardy qoldaýǵa jáne halyqtyń ómir súrý jaǵdaıyn jaqsartýǵa baǵyttalǵan jobalarynyń biri. Atalǵan qor osy kúnge deıin 120-dan astam áleýmettik jobany júzege asyryp, 85 mıllıard teńgege kómek kórsetti.