Áıelder bıznesi qalaı damyp jatyr?
Qazaqstandaǵy SHOB sýbektileriniń 43,5%-yna áıelder jetekshilik etedi. Al Almatydaǵy shaǵyn jáne orta bıznestiń teń jartysyn áıelder basqarady, dep habarlaıdy Almaty-akshamy.kz inbusiness.kz saıtyna silteme jasap.
Almaty ÓKP Áıelder kásipkerligin qoldaý ortalyǵynyń keńesshisi Ásel Jalǵasqyzynyń aıtýynsha, Almatydaǵy SHOB sýbektileriniń teń jartysy áıelderge tıesili. Alyp megapolıstegi shaǵyn jáne orta bıznes sektoryndaǵy jumys oryndarynyń 31%-yn jáne Qazaqstan jalpy ishki óniminiń 14,6%-yn bıznestegi áıelder qamtamasyz etedi. Jalpy, el boıynsha shaǵyn jáne orta kásipkerlik sýbektileriniń 43,5%-yn áıelder basqarady, al Almatyda bul kórsetkish 50%-ǵa teń.
«Búginde qyz-kelinshekter ekonomıkanyń barlyq derlik salasynda jumys istep, bıznesin órge dóńgeletip júr. Áıtse de negizgi salalar – saýda, qyzmet kórsetý, naqtyraq aıtqanda, qastan bastap tyrnaqqa deıin sulýlyq ındýstrıasynyń tolyq spektri, qonaqúı isin júrgizý, mektepke deıingi bilim, bastaýysh bilim berý, sonymen qatar qoǵamdyq tamaqtaný bıznesine den qoıǵan», - deıdi ÓKP Áıelder kásipkerligin qoldaý ortalyǵynyń keńesshisi Ásel Jalǵasqyzy.
Sondaı aq, jyldan-jylǵa Almatyda bıznestegi áıelderdiń úles salmaǵy artyp keledi. Máselen, 2021 jyldyń sońyna qaraı basshy áıelder tirkelgen jeke kásipkerlik nysandarynyń sany bir jylda 9,1%-ǵa, 625,1 myńǵa deıin ósti. Olardyń jeke kásipkerliktegi jalpy sanynyń úlesi de ósti – bir jylda 47,4%-dan 49%-ǵa deıin artqan.
Bıyl elimizdegi tanymal bank áıel kásipkerlerdi qoldaý maqsatynda jyldyń 5 paıyzben nesıeleýge 1 mlrd teńge bóldi. Budan bólek «Bastaý Bıznes» jobasy iske asyrylýda. Joba boıynsha kásipkerlik negizderin 1 aı oqyp, ári qaraı 400 AEK kóleminde grant alýǵa bolady.
«Bastaý Bıznes» oqýyna qatysý úshin business.enbek.kz portalynda tirkelip, oqý sharttaryna sáıkestikti avtomatty tekserýden jáne oqý sharttaryna sáıkestikten ótýi kerek. Sharttarǵa sáıkes kelgen qatysýshy skills.enbek.kz portalyna ótip, oqýǵa kirise alady. Bıyl birinshi lekke ótinim qabyldaý 20 aqpanda bastalyp, 10 kúnge jalǵasty. Aıta ketelik, Qazaqstandaǵy SHOB sýbektileriniń 43,5%-yna áıelder jetekshilik etedi.