Ǵylymı qyzmetkerler, sarapshylar, qoǵam qaıratkerleri jáne BAQ ókilderiniń qatysýymen ótken kóshpeli keńes barysynda qylqan japyraqty aǵashtardyń jaǵdaıy baǵalandy.
Sarapshylar Sátbaev kóshesindegi avtoturaq mańyndaǵy eski shyrshalardyń jaǵdaıyna qatty alańdaýshylyq bildirdi. Aǵashtardan qýraǵan ıneler men dińniń shirý belgileri anyqtaldy, dep habarlaıdy aqshamnews.kz.
Jıembaev atyndaǵy Qazaq ósimdikterdi qorǵaý jáne karantın ǵylymı-zertteý ınstıtýtynyń ǵylymı qyzmetkeri Nurjan Muhamadıevtiń aıtýynsha, tekserý barysynda keı shyrshalardyń ıneleri qýrap, túsi aǵaryp ketkeni baıqalǵan.
«Shyrshalar 60-70 jyldyq, dıametri 30 sm-den asady. Inelerde anyq emes daqtar, kúnniń áserinen kúıgen belgiler bar. Tamyr mańyndaǵy qorektený aýmaǵy azaıǵan. Sondaı-aq, qabyǵynda mehanıkalyq zaqymdanýlar, shaıyr aǵyp shyǵý belgileri jáne ýly gazdardyń áseri baıqalady. Ylǵaldy kamerada jáne qorektik ortada júrgizilgen tájirıbeler kezinde Álternarıa (Alternaria) jáne Mýkor (Mucor) tuqymdas sańyraýqulaqtardyń bolýy anyqtaldy. Alaıda zıandy patogendi aǵzalar tabylǵan joq. Bul dińiniń ishki shirigi men aǵashtardyń sarǵaıyp ketýine baılanysty. Sanıtarlyq jaǵdaı boıynsha bul aǵashtar álsiz dep baǵalandy (KSO-3). Dekoratıvtik qasıetin joǵaltqandyqtan, olardy tózimdi qylqan japyraqty aǵash túrlerine aýystyrý usynylady», – dedi Muhamadıev.
«EkoAlmaty» JSHS-niń bólim basshysy Bolat Ámirǵalıev rezıstograf arqyly júrgizilgen zertteýler aǵashtardyń quryp bara jatqanyn, zıankester men aýrýlardyń keń taraǵanyn kórsetkenin atap ótti. «Skverdegi keıbir shyrshalar tolyqtaı qýrap qalǵan, birinshi kezekte solardy kesý kerek», – dedi ol.
«Jasyl komısıa» múshesi Omar Nurhaıdarovtyń aıtýynsha, aǵashtardyń avtoturaqqa jaqyn ornalasýy olardyń qulap, kólikke jáne jaıaý júrginshilerdiń qaýipsizdigine qater tóndiretinin kórsetken. Osyǵan baılanysty sarapshylar yqtımal qaýip-qaterdiń aldyn alý úshin eski aǵashtardy kesýdi usyndy.
Kóshpeli keńes nátıjesinde eski aǵashtardyń ornya iri kóshetter otyrǵyzý týraly sheshim qabyldandy. İri kóshetter – bul bıiktigi 4 metrden asatyn, tamyr júıesi jaqsy damyǵan, dińi men ushar basy bar, Almaty qalasynyń klımattyq jaǵdaıyna beıimdelgen jergilikti tálimbaqtarda ósirilgen aǵashtar.