Qazaqstan mektepterinde «100 medıatıvti mektep» jobasy iske qosyldy. Bul bastama eldegi barlyq bilim berý uıymdarynda qaýipsiz jáne qoldaýshy ortany qalyptastyrýǵa baǵyttalǵan. Jobanyń basty maqsaty – qaqtyǵystardy tıimdi sheship, oqýshylar, pedagogter jáne ata-analar úshin jaǵymsyz saldardyń aldyn alý, dep habarlaıdy aqshamnews.kz
Joba aıasynda mektep medıasıasy qyzmetteri qurylyp, biregeı ádistemelik usynymdarmen qamtamasyz etildi. Y.Altynsarın atyndaǵy Ulttyq bilim akademıasy ázirlegen usynymdar mektep medıasıasyn uıymdastyrýdyń teorıalyq jáne praktıkalyq materıaldaryn qamtıdy. Bul qujattar mektepterde medıatıvtik praktıkalardy engizýge negiz bolyp, medıatıvti qyzmetterdiń tıimdiligin arttyrady.
Jobanyń negizgi maqsaty – qıyn ómirlik jaǵdaılarda oqýshylarǵa qoldaý kórsetý, otbasylyq jáne mektepishilik daýlardy sheshý, sondaı-aq medıatıvtik ádister arqyly oqýshylardyń damý múmkindikterin arttyrý. Sonymen qatar, mektepterdegi psıhologıalyq ahýaldy jaqsartý jáne daýly jaǵdaılardyń sanyn azaıtý kózdelgen.
Medıasıa qyzmetterine ártúrli áleýmettik toptardyń ókilderi tartylady, olar:
- Joǵary synyp oqýshylary,
- Pedagogter men pedagog-psıhologtar,
- Áleýmettik pedagogter,
- Ata-analar,
- Úkimettik emes uıymdardyń, qamqorshylyq keńesterdiń jáne aǵa urpaqtyń ókilderi.
QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova bul jobanyń mańyzdylyǵyn erekshe atap ótti. Onyń aıtýynsha, medıatıvtik praktıka oqý oryndaryndaǵy psıhologıalyq ahýaldy jaqsartyp, oqýshylardyń áleýmettenýine yqpal etedi. Sonymen qatar, otbasylyq-quqyqtyq daýlardy sheshýge járdemdesý jáne mektepterdegi jalpy jaǵdaıdy jaqsartý arqyly qoǵamdaǵy beıbitshilikke úles qosady.
Bul joba mektepterdegi tárbıe jumysyn jańa deńgeıge kóterip, oqýshylar men ata-analardyń arasyndaǵy ózara túsinistikti nyǵaıtýǵa septigin tıgizedi. «100 medıatıvti mektep» jobasy Qazaqstannyń bilim berý salasynda úlken jańalyq bolmaq.