Almatynyń júreginde ornalasqan Saıran kóliniń jaǵasynda erekshe ekologıalyq shara ótip jatyr. Tabıǵatty aıalaýǵa úndeıtin bul tazalyq aksıasyna elimizdiń tanymal tulǵalary - ánshiler, akterler men jazýshylar belsene at salysyp jatyr, dep habarlaıdy Aqshamnews.kz tilshisi
Tazalyq aksıasyna estrada juldyzdary Jubanysh Jeksenuly, Dıana Ismaıl, Tahmına Áshimbekova, Qazybek Ádikeı men Dımash Dáýletov qatysyp, tabıǵatty taza ustaýǵa shaqyrdy. Sonymen qatar, sahna sańlaqtary Ulan Núsipáli, Lıza Serikova, Kamalıa Baıtleýova, Baqyt Týshaev pen Áset Imanǵalı da qoldaryna qap alyp, kól jaǵasyn qoqystan tazartýǵa úles qosty.
Aksıaǵa ádebıet maıtalmandary - Qazaqstannyń halyq jazýshysy Ulyqbek Esdáýlet, pýblısıs Bıgeldi Ǵabdýllın, aqyn, jazýshy Murathan Shoqan men jazýshy Nurdáýlet Aqysh ta qatysty. Olar tabıǵatty qorǵaýdyń mańyzdylyǵyn aıtyp, jastardy osyndaı ıgi isterge jıi qatysýǵa úndedi.
Ánshi Jubanysh Jeksenuly:
"Saıran – bizdiń ortaq ıgiligimiz. Qalany taza ustaý – árqaısymyzdyń paryzymyz. Qala jalǵyz, biz kóppiz. Eger ár adam jaýapkershilikpen qarasa, tabıǵatty búldirmeımiz", – dep pikir bildirdi.
Jazýshy Ulyqbek Esdáýlet te óz oıyn bólisti:
"Saıran – Almatynyń sáni, kórki. Onyń tabıǵı kelbetin saqtaý – bizge amanat. Bul kóldi saqtaý – bolashaqqa mura qaldyrý degen sóz", – dedi ol.
Shara sońynda qatysýshylar taza jaǵalaýda estelik sýretke túsip, ekologıany saqtaýdyń mańyzdylyǵy jaıly oılarymen bólisti.