Rysqulov-Bókeıhanov jolaıyryǵyndaǵy aýmaqta ortasha jóndeý jumystaryn júrgizýge baılanysty kólik qozǵalysy ýaqytsha shekteledi, dep habarlaıdy aqshamnews.kz
31 shilde saǵat 23:00-den 1 tamyz saǵat 23:00-ge deıin shyǵys baǵytta Rysqulov dańǵylynan Bókeıhanov kóshesine deıingi burylysta, sondaı-aq Bókeıhanov kóshesindegi ońtústik baǵyttan shyǵys baǵytqa qaraı burylys pen Rysqulov dańǵylyna shyǵar jol tolyǵymen jabylady.
Jóndeletin aýmaqta eskertý belgileri, merdiger uıym basshysynyń baılanys nómiri jazylǵan stendter qoıylady.
Esterińizge sala keteıik, qozǵalysty shekteýge qatysty barlyq aqparat Almaty.kz saıtynda, @AlmatyJoly Telegram arnasynda, aýdandyq ákimdikter men basqarmalardyń áleýmettik jelilerinde, sondaı-aq 2GIS pen «Iandeks kartalar» servısterinde jazylǵan.
