Almaty ákimi Erbolat Dosaev Qarǵaly ózeniniń jaǵalaýyn rekonstrýksıalaý jumystarynyń barysymen tanysty, dep habarlaıdy almaty-akshamy.kz
Almaty ákimi Erbolat Dosaev jumys sapary barysynda Naýryzbaı aýdanyndaǵy Qarǵaly ózeniniń jaǵalaýyn rekonstrýksıalaý jumystarynyń barysymen tanysty. Selden qorǵaý bógetinen Jandosov kóshesine deıingi uzyndyǵy 7,7 km ýchaske abattandyrylady jáne modernızasıalanady.
Naýryzbaı aýdanynyń ákimi Nazıra Toǵyzbaeva qala basshysyna esep berdi, munda joba boıynsha jaıaý júrginshiler aımaǵyn jaılastyrý, syrtqy jaryqtandyrý jelilerin ornatý, sýarý júıesin salý, 6 kópir ótkeli, balalar oıyn jáne sport alańdary, kóshe jıhazdaryn ornatý qarastyrylǵan. Sondaı-aq, 3 myń japyraqty jáne qylqan japyraqty aǵashtar otyrǵyzylady. Barlyq qurylys jumystaryn osy jyldyń sońyna deıin aıaqtaý josparlanýda.
Jobanyń mańyzdy bóligi balalar men sport alańdary, jaıaý júrginshi joldary jáne ózen jaǵasynda demalý múmkindigi bar jańa qoǵamdyq keńistik qurý bolyp tabylady. Balalarǵa arnalǵan qumsalǵyshtar men sý aımaqtary, sondaı-aq oryndyqtar men ústelder bar ári ata-analarǵa arnalǵan demalys aımaqtaryn qurý josparlanýda.
«Ózen arnasy tazartylady. Jalpy alańy 3,7 myń sharshy metr bolatyn trotýar tósemi jasalady, turaq alańy – 2 myń sharshy metrden astam, kógaldandyrý-3,8 gektardan astam. Kelýshilerdiń jaılylyǵy úshin 135 oryndyq pen ýrna ornatý josparlanýda», - dep atap ótti N. Toǵyzbaeva.
Erbolat Dosaev modernızasıa kezinde sapaly qurylys materıaldaryn paıdalaný mańyzdy ekenin atap ótti. Megapolıs ákimi ártúrli erekshelikteri men qajettilikteri bar balalardyń qol jetimdiligin qamtamasyz etý úshin oıyn alańdarynda ınklúzıvti elementterdi qarastyrý qadap turyp aıtty.
Kópir joldaryn rekonstrýksıalaý kezinde jaıaý júrginshiler men velosıpedshilerdiń qaýipsizdigine jáne qol jetimdilikke erekshe mán beriledi. Sondaı-aq, jalpy uzyndyǵy 2,7 km sýarmaly sý qubyry jasalady, iske asyrylyp jatqan joba Qarǵaly ózeniniń jaǵalaýyn qala shegindegi biregeı tabıǵı saıabaqqa aınaldyrady.
Rekonstrýksıalanyp jatqan ýchaskege barǵan kezde qala basshysy birqatar kemshilikterge nazar aýdaryp, irgeles aýmaqty retke keltirýdi, qala turǵyndarynyń yńǵaıly ótýi úshin jaıaý júrginshiler joldaryn salýdy, Qarǵaly ózeniniń arnasyn zertteýdi aıaqtaýdy, úılerdiń nómirlenýin júıeleýdi tapsyrdy.
Megapolıs ákimi Erbolat Dosaev aıtylǵan eskertýlerdi nazarǵa alýdy, belgilengen kestege sáıkes jumystardy jalǵastyrýdy tapsyrdy.
Esterińizge sala keteıik, Jetisý aýdanynda Esentaı ózeniniń jaǵalaýyn abattandyrý jumystary bastaldy. Jaǵalaýdyń jalpy uzyndyǵy 1200 metrdi quraıdy. Rekonstrýksıalaý aıasynda ózen arnasy tazartylady, sondaı-aq serýendeý aımaǵy qurylady.