Túrksib aýdanynda áleýmettik nysandardy, atap aıtqanda, bilim berý mekemelerin – balabaqshalardy, mektepterdi, kolejderdi abattandyrý jalǵasýda.
Máselen, aǵymdaǵy jyldyń aqpan aıynda №195 mektep janyndaǵy 450 oryndyq qosymsha qurylys aıaqtaldy, endi №50 jalpy bilim beretin mektepke kúrdeli jóndeý, seısmıkalyq kúsheıtý júrgizilýde, mundaǵy jumystar 2025 jylǵy jeltoqsanda aıaqtalady. Bul týraly Almaty qalasy Túrksib aýdanynyń ákimdiginen habarlady.
№59 gımnazıa fılıalyn rekonstrýksıalaý jalǵasýda, ol aǵymdaǵy jyldyń tamyz aıynda aıaqtalady. 6100 oryndyq tórt jańa mektep salý boıynsha qurylys-montajý jumystaryn aıaqtaý da olsy kezeńge josparlanǵan. Atalǵan oqý oryndarynyń qurylysy qala ákimdiginiń jobalyq ofısiniń qoldaýymen «Jaıly mektep» Ulttyq jobasy aıasynda júrgizilýde.
Aıta keteıik, oqýshy oryndarynyń tapshylyǵyn tómendetý maqsatynda ótken jyly №59 mektep-gımnazıasyn 300 oryndyq seısmıkalyq kúsheıtýmen jáne keńeıtýmen jáne №83 gımnazıa fılıalyn rekonstrýksıalaý aıaqtaldy.
2024 jyldyń maýsym aıynda Almaty telekomýnıkasıa jáne mashına jasaý kolejiniń jańa ǵımaratynyń qurylysy bastaldy. Jobada oqý sheberhanalaryn zamanaýı jabdyqtarmen jaraqtandyrý jáne stýdentterge arnalǵan 120 oryndyq jataqhana salý kózdelgen. Jumystardy aıaqtaý 2026 jyldyń qańtaryna josparlanǵan.
Aýdan ákimdigi mektepke deıingi mekemelerge qatysty oryn tapshylyǵyn qysqartý boıynsha jumystar júrgizýde. Ótken jyly seısmıkalyq kúsheıtý jumystary aıaqtalǵannan keıin №70 mamandandyrylǵan bóbekjaı ashyldy. Aǵymdaǵy jyldyń birinshi jartyjyldyǵynda «Qaırat» sh/a 260 oryndyq №192 jańa balabaqsha ashý josparlanýda.