Almatyda qańtar oqıǵasy kezinde búlingen Prezıdent rezıdensıasyn buzýǵa jarylǵysh zattar qoldanylmaıdy, dep habarlaıdy Almaty-akshamy.kz «Habar 24»-ke silteme jasap.
Qańtar oqıǵasy kezinde órtengen Prezıdent rezıdensıasynyń ishinde ystyń ıisi áli de ketpegen. Temir baǵanalar balqyp, beton qabyrǵalardyń beriktigi buzylǵan. 19 myńnan astam sharshy metrdi alyp jatqan alyp ǵımaratty buzýdyń ózi tehnıkalyq turǵydan óte kúrdeli jumys. Sondyqtan súrýge 3 mlrd teńge qajet. Taǵy 3 mlrd teńge aýmaqty qalpyna keltirýge jáne ınjenerlik korpýsty qaıta qurylymdaýǵa jumsalady. «Olar keıin qalanyń balansyna ótedi», – deıdi mamandar.
Ǵımarat qurylymynda alty myń sharshy metr temirbeton bar. Ony bir-birinen ajyratyp, bólshekteýge gıdravlıkalyq balǵasy bar arnaıy tehnıka qoldanylady. Osy ýaqytqa deıin rezıdensıada tek tazalaý jumysy ǵana atqarylypty. Al qashan buzyla bastaıtyny ázirge belgisiz.
Órtten biren-saran dúnıe aman qalypty. Sondaı 46 ataýly qural-jabdyq rezıdensıadan shyǵarylady. Saqtaýly turǵan tońazytqysh tehnıkalary men dızel-generatorlardyń jalpy somasy 600 mln teńge bolady. Bul qural-jabdyqtar Prezıdent is basqarmasynyń basqa da nysandaryna beriledi. Taǵy 150 mln teńge metaldy qaıta óńdeýden túsedi. Jalpy ǵımaratty buzýǵa ketken shyǵynnyń 750 mln teńgesi búdjetke qaıtarylady. Al rezıdensıa súrilgen soń ornyna saıabaq salý josparlanǵan.