Almaty ákimi Baqytjan Saǵyntaev Jetisý aýdany Aqtolqyn kóshesindegi órtengen úıdiń turǵyndarymen kezdesti. Qala basshylyǵy olarǵa jańa baspana satyp áperdi.
Megapolıs ákimi Baqytjan Saǵyntaev Instagram-daǵy óziniń akkaýntynda órtengen úıde turatyn otbasylarǵa barǵany týraly aıtty, dep habarlaıdy Almaty-akshamy.kz
Qala ákimi turǵyndarmen birge árleý jumystary júrip jatqan jańa úıdi qarap shyqty.
«Búgin órtten zardap shekken 14 otbasynyń máselesine núkte qoıyldy. Jetisý aýdany Aqtolqyn kóshesindegi úı qalpyna keltirilmeıdi. Turǵyndarmen birge salynyp jatqan úıden jergilikti búdjet qarajaty esebinen satyp alynatyn jańa páterlerdi qaradyq. Kóshýge biraz ýaqyt qaldy. Bolashaq qonys ıelerine baqyt tileımiz!» - dep jazdy Baqytjan Saǵyntaev.
Jańa úı de Jetisý aýdanynda ornalasqan. Osylaısha qalalyqtardyń josparlanbaǵan qonys aýdarýǵa beıimdelýi jeńil ótetin bolady.