Almaty prokýratýrasy eki mektep oqýshysynyń ózine qol jumsaý isi boıynsha bes aıdan beri júrgizilip jatqan tergeý barysy týraly pikir bildirdi, dep habarlaıdy aqshamnews.kz.
Resmı suraýǵa jaýap retinde qalalyq prokýratýra mektep oqýshylarynyń sýısıd jasaý oqıǵasy boıynsha qylmystyq is Qazaqstan Respýblıkasy Bas prokýratýrasynyń sotqa deıingi tergeý qyzmeti óndirisinde ekenin habarlady.
"Qazirgi ýaqytta sotqa deıingi tergeý jalǵasyp jatyr. Qylmystyq qýdalaý organy oqıǵanyń barlyq mán-jaıyn Qazaqstan Respýblıkasy Qylmystyq-prosestik kodeksiniń 24-babynyń talaptaryna sáıkes anyqtap jatyr", – dedi Almaty prokýrorynyń orynbasary Asqat Sháripov.
16 qyrkúıekte Almatydaǵy turǵyn úıdiń janynan eki oqýshy qyzdyń máıiti tabylǵan edi. Qaıǵyly oqıǵa Almaly aýdanynda bolǵan.
Alǵashqy aqparat áleýmettik jelilerde tarady, onda qyzdardyń páter terezesinen qulap ketkeni týraly boljamdar aıtylǵan. Sondaı-aq, bul qaıǵyly oqıǵanyń "qaýipti" onlaın oıyndar men erekshe ádebıettermen baılanysy bolýy múmkin degen pikirler paıda boldy. Keıin Almaty polısıasy mektep oqýshylarynyń qaıtys bolǵanyn rastady. Almaly aýdanynyń polısıa basqarmasy qylmystyq is qozǵap, oqıǵanyń sebebi men mán-jaıyn anyqtaı bastady.
İshki ister mınıstriniń orynbasary Igor Lepeha bul oqıǵanyń sýısıd ekenin málimdep, "Ózin-ózi óltirýge deıin jetkizý" baby boıynsha qylmystyq is qozǵalǵanyn habarlady.