Almaty qalasy Naýryzbaı aýdanyndaǵy №174 mektep-gımnazıasynda oqýshylar jýrnalısıka negizderin meńgerip, óz oılaryn qaǵaz betine saýatty ári sheber jetkizýdi úırenip júr. Mundaı múmkindikke olar mektepishilik «Urpaq úni» gazeti arqyly ıe boldy.
– Áleýmettik jeliler arqyly syrtqy álemmen baılanys búginde qalamyzdaǵy mektepterdiń ómiriniń ajyramas bóligine aınaldy. Biraq búkil álemge mektep jetistikterin jarıalaý bir basqa, al sol jetistikter men mektep qaharmandaryn oqýshylar men muǵalimderdiń ózderine tanystyrý – múlde basqa másele. Osy maqsatta «Urpaq úni» gazeti quryldy. Bul basylym mańyzdy oqıǵalardy jarıalap qana qoımaı, oqýshylar men ustazdar arasyndaǵy baılanysty nyǵaıtyp, «oqýshy – ata-ana – muǵalim» úshtiginiń úılesimdi jumysyna jol ashady, – deıdi Naýryzbaı aýdandyq bilim bóliminiń basshysy Saltanat Qusaıynova.
Mektepte qolǵa alynǵan osy áleýmettik mańyzy bar jobanyń nátıjesinde arnaıy medıa-stýdıa ashyldy. Jaqynda oqýshylar óz qoldarymen ázirlegen «Urpaq úni» gazetiniń alǵashqy sandaryn jaryqqa shyǵardy. Gazette mektep ómirine qatysty qyzyqty, paıdaly ári tanymdyq materıaldar jarıalanady. Basylym aıyna bir ret baspahanada basylyp shyǵady. Ony oqýshylar óz bastamasymen, muǵalimderdiń qoldaýymen júzege asyrady. Muǵalimder arasynan bas redaktor taǵaıyndalǵanymen, negizgi jumysty – dızaınerlik, tilshilik, foto jáne taǵy basqa mindetterdi oqýshylar ózderi atqarady.
– «Urpaq úni» – jańa býynnyń medıajobasy. Ol jastardyń únin, armany men kózqarasyn jetkizetin basylym. Gazettiń maqsaty – mekteptegi shyǵarmashylyq pen aqparattyq alańdy damytý, oqýshylardy jýrnalısıka men sóz ónerine baýlý, qoǵammen qarym-qatynas mádenıetin qalyptastyrý jáne «oqýshy – muǵalim – ata-ana» yntymaqtastyǵyn nyǵaıta otyryp, mekteptegi baspasóz ortalyǵynyń jumysyn jandandyrý, – deıdi qazaq tili men ádebıeti pániniń muǵalimi, bas redaktor Jetkenshek Meńdiǵalıev.
Jýyrda mektepte gazettiń saltanatty tusaýkeseri ótti. İs-sharaǵa ustazdar, oqýshylar men ardaqty qonaqtar qatysty.