Almatyda jańa bilim berý jobasy – Jasandy ıntellekt mektebi óz jumysyn Almaly aýdanyndaǵy komúnıtı-ortalyq bazasynda bastaıdy, dep habarlaıdy aqshamnews.kz
Bul bastama Almaty qalasy Jastar saıasaty basqarmasynyń qoldaýymen Qazaq IT Community seriktestigi aıasynda júzege asyrylyp, jastardy damytýǵa baǵyttalǵan.
Joba aıasynda almatylyq jastar jasandy ıntellekt tehnologıalaryn tegin úırenip, zamanaýı AI-quraldaryn meńgerip, olardy oqý, zertteý jáne bolashaq kásibı qyzmetinde qoldana alady. Oqý baǵdarlamasy mashınalyq oqytý algorıtmderin, neırondyq jelilerdiń negizderin, derektermen jumys isteýdi jáne AI-dy túrli salalarda paıdalanýdy praktıkalyq túrde oqytýdy qamtıdy.
«Jasandy ıntellekttiń damýy – jaı ǵana trend emes, bul Qazaqstannyń álemdik tehnologıalyq arenada belsendi oıynshyǵa aınalýyna aparatyn bolashaqtyń kilti. Almaly aýdanyndaǵy komúnıtı-ortalyqta JI mektebiniń ashylýy – Almatyda myqty IT-qoǵamdastyq qurý jolyndaǵy mańyzdy qadam. Bul jerde jastar zamanaýı tehnologıalardy meńgerip, ozyq bilimge qol jetkizedi. Biz bul bilimniń jastarǵa tek bolashaǵy zor mamandyqtardy ıgerýge ǵana emes, sonymen qatar ınovasıalyq sheshimderdi jasaýǵa kómektesetinine senimdimiz», – dep atap ótti Qazaq IT Community negizin qalaýshy Ásem Bolatjan.
Aıta ketý kerek, Almatyda jastarǵa arnalǵan 11 komúnıtı-ortalyq jumys isteıdi, olar qalanyń ár aýdanynda ornalasqan. Árbir komúnıtı-ortalyq – bul jastardy qoldaýǵa baǵyttalǵan kreatıvti qoǵamdyq keńistik. Munda memlekettik baǵdarlamalar boıynsha keńes berý, psıhologıalyq jáne zańgerlik kómek, NEET-jastarǵa qysqa merzimdi kýrstar arqyly zamanaýı mamandyqtardy úıretý jáne jumyspen qamtý sharalary qarastyrylǵan.
«Men jasandy ıntellekt tehnologıalaryna burynnan qyzyǵatynmyn, biraq neden bastarymdy bilmedim. Osy mekteptiń arqasynda men zamanaýı AI-quraldaryna qol jetkizip, olardy oqýymda qoldana bastadym. Bul – Almaty jastary úshin keremet múmkindik!» – dep óz áserimen alǵashqy qatysýshylardyń biri, stýdent Aıbek Sarsenov bólisti.
Oqytýǵa jazylý úshin jastar Almaly aýdanyndaǵy komúnıtı-ortalyqqa Baıtýrsynuly 22k1 mekenjaıy boıynsha júgine alady.