Búginniń ózinde 17 stýdent jataqhanaǵa ornalasty
Almatyda jataqhanaǵa muqtaj stýdentterge arnalǵan «Jedel shtab» ashyldy, dep habarlaıdy Almaty-akshamy.kz «Habar 24» telearnasyna silteme jasap.
Ol Sátpaev ýnıversıtetiniń ekinshi jataqhanasynda ornalasaqan. Oǵan Almatyǵa oqýǵa túsken kez kelgen stýdent nemese olardyń ata-anasy habarlasa alady. Shtab ókilderi ár stýdenttiń bilim alatyn ýnıversıtetine habarlasyp, olarǵa jataqhanadan oryn berilýin qadaǵalaıdy. Oǵan deıin ekinshi jataqhanada eki kún tura alady. Bul jumysqa Almatynyń barlyq joǵary oqý orny atsalysady.
Jedel shtab táýligine 100-ge deıin stýdentti qabyldaýǵa daıyn. Búginniń ózinde 17 stýdent jataqhanaǵa ornalasty. Shtab jumysymen ǵylym jáne joǵary bilim mınıstri Saıasat Nurbek tanysyp, stýdenttermen kezdesti. Mınıstr kelesi jyldan bastap kóp balaly jáne muqtaj otbasylardan shyqqan stýdentterge shákirtaqyǵa qosymsha 50-60 myń teńge qarajat qarastyrylatynyn aıtty. Bul kómek stýdentterdiń páter nemese jataqhana jaldap turýy úshin beriledi.
«Endi kez kelgen joǵarǵy oqý orny bizden lısenzıa nemese ruqsat alý kezinde jańa mamandyq ashý úshin arnaıy shart, talaptar qoıylady. 100 adamdy qabyldasańyz, osy baǵdarlamada onda 100 jataqhana oryndardy talap etemiz biz. Sondyqtan sharttar kúsheıedi. Arnaıy Qarjy ortalyǵymen birigip, baǵdarlama pysyqtalady. 2026 jylǵa deıin 70-80 paıyz qajettilikti jabýǵa tyrysamyz. 2029jylǵa qaraı 100 paıyz osy máseleni sheshýge tyrysamyz», - deıdi QR ǵylym jáne joǵary bilim mınıstri Saıasat Nurbek.