Shaharymyzda «Januıa» mamandandyrylǵan kesheni jetim balalarǵa qoldaý kórsetip, qamqorlyq jasap keledi. Al, jaqyn arada jańa, zamanaýı ǵımaratqa kóshetin bolady. «BI Group» qurylys kompanıasy bıznestiń óz qarjysy úshin áleýmettik jaýapkershilik aıasynda eski ǵımaratty buzyp, jańa zamanaýı keshen salýdy josparlaǵan bolatyn.
–Nysan álemdik standarttarǵa saı bolady. Biz balalar úshin barlyq qajetti jaǵdaılardy jasaımyz. Bul zamanaýı ári qaýipsiz keńistik bolady, onda balalar jan-jaqty qoldaý taýyp, damýǵa múmkindik alady. Qurylys tolyqtaı búdjetten tys qarjylandyrylady, ıaǵnı qurylys salýshynyń qarajaty esebinen. Jobanyń shamamen quny 5 mıllıard teńgeni qurap otyr. Biz jańa ǵımarat jetim balalardyń bolashaǵy úshin mańyzdy qadam bolatynyna senimdimiz, olarǵa tolyqqandy ómir súrip, bilim alýǵa múmkindik beredi, - dedi Almaty qalasy ákiminiń orynbasary Ásem Núsipova.
«Januıa» MK 2006 jyldan bastap jumys isteıdi, ol jetim balalar men ata-anasynyń qamqorlyǵynsyz qalǵan balalarǵa arnalǵan balalar úıin, 4 jastan 18 jasqa deıingi zıatkerlik kemistigi bar balalarǵa arnalǵan túzetý mektep-ınternatyn qamtıdy. Jańa ǵımarattyń qurylysy kelesi jyly aıaqtalady dep kútilýde. Bul týraly «Januıa» MK qamqorshylyq keńesiniń tóraǵasy Rafael Gasanov aıta ketti.
–Biz jańa kampýstardyń qurylysyn 2025 jyldyń tamyzyna deıin aıaqtaýdy maqsat etip otyrmyz. Bizdiń mindetimiz – qyrkúıek aıynda balalar jańa ǵımaratqa kóship, yńǵaıly jaǵdaıda jańa ómir bastaýy úshin barlyq jaǵdaıdy jasaý. Búgingi kúnge deıin «Januıa» kesheninde 420 bala turyp, bilim aldy, olardyń keıbiri qazirgi ýaqytta arnaıy ınternatta, al basqalary qalalyq mektepterde oqýda, - dedi ol.