Almaty ákimi Erbolat Dosaev Túrksib aýdanyndaǵy 586 eski úıdi renovasıalaý jospary týraly aıtyp berdi
Túrksib aýdanynyń turǵyndarymen kezdesý barysynda Almaty ákimi Erbolat Dosaev aýdandaǵy eski turǵyn úılerdi renovasıalaý boıynsha júrgizilip jatqan jumystar týraly aıtyp berdi.
Búginde Almatyda 1 366 eski úı bar, onyń 40% - dan astamy Túrksib aýdanynda ornalasqan.
«Ótken jyly Kassın jáne Saýranbaev kóshelerinde 13 jańa kóppáterli turǵyn úıdiń qurylysy aıaqtaldy. Altaı - 2 shaǵyn aýdanynda 6 buzylǵan úıdiń ornyna toǵyz qabatty 3 úıdiń qurylysy júrgizilýde. Sondaı-aq Saýranbaev kóshesinde 3 úıdi buzý josparlanyp otyr, odan keıin 8 jańa kóppáterli turǵyn úı salynady», - dedi Erbolat Dosaev.
Esterińizge sala keteıik, qala ákimdigi 2030 jylǵa deıin turǵyn úıdi renovasıalaýdyń jańa baǵdarlamasyn ázirlegen edi. Baǵdarlamada 676 eski úıdi renovasıalaý qarastyrylǵan. Tektonıkalyq aqaýlarda ornalasqan qańqaly-qamysty úıler men ǵımarattardy buzýǵa basa nazar aýdarylady.
Baǵdarlamanyń negizgi qaǵıdaty-qurylysty toqsandyq júrgizý. Ǵımarattardy kóshirý jáne buzý barlyq eski turǵyn úı ıeleriniń kelisimimen ǵana júzege asyrylatyn bolady. Bul rette menshik ıelerine «bólme úshin bólme» qaǵıdaty boıynsha aıyrbastaý nemese naryqtyq quny boıynsha aqshalaı ótemaqy alý múmkindigi beriledi.