Almatyda Maılın kóshesi men Seıfýllın dańǵyly boıynda bıyl jylý jelileri jańartylady
Túrksib aýdanynda jylý jelilerin jańǵyrtý jumystary qarqyn alǵan. Bul týraly qala ákimi Erbolat Dosaev aýdan turǵyndarymen kezdesýde málimdedi. Onyń aıtýynsha, aýdandaǵy jylý jelileriniń tozý deńgeıi shamamen 80%, sondyqtan olardy jańartý basty mindettiń biri, dep habarlaıdy aqshamnews.kz
2024 jyly eki negizgi ýchaskede 2,1 km jylý jelisiniń qaıta jańǵyrtý jumystary aıaqtaldy: Spassk kóshesinde (Nursaıa kóshesinen Ýrıskıı kóshesine deıin) jáne Súıinbaı kóshesinde (Bekmahanov kóshesinen Garshın kóshesine deıin). Bul jumystar osy aýmaqtardaǵy jylýmen qamtý senimdiligin aıtarlyqtaı arttyryp, jylý shyǵynyn azaıtýǵa múmkindik berdi.
2025 jyly taǵy 8,1 km jylý jelilerin aýqymdy túrde jańartý josparlanǵan. Naqtyraq aıtqanda, jumys Maılın kóshesinde – Namanganskaıa kóshesinen Montajnaıa kóshesine deıin júrgiziledi. Sondaı-aq, jańǵyrtý jumystary Seıfýllın dańǵyly boıynda – Aqan seri kóshesinen Kotelnıkov kóshesine deıingi aralyqty qamtıdy. Jumystar kezeń-kezeńimen júrgiziledi, turǵyndarǵa qolaısyzdyqty barynsha azaıtý qarastyrylǵan.
Aıta keteıik, jylý jelilerin jańartý Almaty qalasyndaǵy ınjenerlik ınfraqurylymdy jańǵyrtý boıynsha júzege asyrylyp jatqan aýqymdy baǵdarlamanyń bir bóligi.