Almatydaǵy Esentaı ózeniniń jaǵalaýy qalaı kórkeıtiletini aıtyldy, - dep habarlaıdy Aqshamnews.kz tilshisi.
Almaty ákimdigi eldegi iri qurylys kompanıalarynyń biri – BI Group kompanıasyn Esentaı ózeniniń boıyn abattandyrý boıynsha aýqymdy jobaǵa tartty. Kelisimge sáıkes, bıznestiń áleýmettik jaýapkershiligi aıasynda BI Group kompanıasy bul jobany júzege asyrýǵa 11 mıllıard teńgeden astam qarjy quıyp, ózen arnasy boıyndaǵy ál-Farabı dańǵylynan bastap Rysqulov dańǵylyna deıingi 7,2 shaqyrymdyq aýmaqty retke keltirmek.
Jobanyń maqsaty - qalanyń joǵarǵy jáne tómengi bóligin biriktiretin zamanaýı qoǵamdyq keńistik qalyptastyrý. Qurylys jumystary kezeń-kezeńimen júzege asady. Alǵashqy kezeń – ál-Farabı dańǵylynan Abaı dańǵylyna deıingi ýchaskede abattandyrý jumystaryn bıyl aıaqtaý josparlanǵan.
Joba aıasynda ózen jaǵalaýynda jaıaý júrginshiler men velosıped joldary, jańa saıabaqtar men demalys oryndary salynady. Zamanaýı qala keńistigine saı, oryndyqtar men kógaldandyrý elementteri ornatylady. Sonymen qatar, aýmaq maqsatty baǵyttar boıynsha júıelenip, jastar men stýdentterge arnalǵan, mádenı jáne belsendi demalys aımaqtary, sondaı-aq tynysh demalysqa arnalǵan tynyǵý oryndary qamtylady.
Sarapshylardyń pikirinshe, Esentaı ózeniniń boıyndaǵy aımaq erekshe áleýetke ıe. Ózen arnasy jasyl beldeýlerdi, turǵyn úı keshenderin, stýdenttik kampýstardy kesip ótedi ári mádenı-sporttyq nysandarǵa jaqyn ornalasqan. Arna boıyndaǵy bos jatqan jerler qosymsha kógaldandyrý men jańa skverler jasaýǵa múmkindik berip, qalanyń demalys pen týrızm turǵysynan tartymdylyǵyn arttyra túsedi.
Almaty ákimdigi qala keńistigin damytý jáne turǵyndar úshin qolaıly orta qalyptastyrý maqsatynda áleýmettik jaýapty bıznesti tartý jumystaryn júıeli túrde jalǵastyra beredi.