Jylý elektr ortalyǵyn gazǵa aýystyrýdyń birinshi kezeńinde zalaldy shyǵaryndylar kólemin 35 myń tonnadan 23 myń tonnaǵa deıin, 2026 jyly tolyq iske asyrý kezinde – 2,7 myń tonnaǵa deıin tómendetýge múmkindik bar, dep habarlaıdy Almaty-akshamy.kz QazAqparatqa silteme jasap.
Memleket basshysy ekologıa máselesin jiti nazarda ustaıdy. Byltyr Almaty qalasyna jumys saparymen kelgen Prezıdent almatylyqtardy qaladaǵy aýanyń lastanýy qatty alańdatyp otyrǵanynan habardar ekenin jetkizgen edi.
Onyń aıtýynsha, jyl saıyn atmosferaǵa shyǵarylatyn zıandy qaldyqtyń kólemi 125 myń tonnaǵa jýyqtaıdy.
Aýany negizinen avtokólikter, qalalyq jylý elektr stansıalary, ónerkásip kásiporyndary jáne gaz tartylmaǵan jer úıler lastaıdy.
Megapolıste aýanyń taza bolýyna tyǵyz ári retsiz salynǵan ǵımarattar da kedergi keltirip tur.
Memleket basshysy ákimdikke ónerkásip kásiporyndarynyń ekologıalyq qaýipsizdik normalaryn saqtaýyn qatań qadaǵalaýdy tapsyryp, JEO-2 jáne JEO-3 ortalyqtaryn gazǵa kóshirý arqyly zıandy qaldyqtardy on eseden astam tómendetýge bolatynyn aıtqan edi.
Búginde megapolıstegi aýanyń lastanýynyń negizgi sebepteriniń biri JEO-2 bolyp tabylady, mamandardyń baǵalaýy boıynsha zalaldy shyǵaryndylardyń 30%-na deıin oǵan tıesili.
Osy jyldyń mamyr aıynda Erbolat Dosaev «Samuryq-Energo» AQ, «Qazaqgaz UK» AQ, «KEGOC» AQ, «Samruk-Kazyna Construction» AQ, «Alataý jaryq kompanıasy» AQ basshylarymen joǵaryda atalǵan máselege qatysty kezdesken bolatyn.
Kezdesý barysynda taraptar megapolıstiń energokeshenin damytý perspektıvalaryn, onyń ishinde JEO-2 gazǵa aýystyrý, jylý magıstraldaryn, elektr jelilerin jańǵyrtý, Almaty aglomerasıasynyń turǵyn alaptaryn odan ári gazdandyrý, qoǵamdyq kólikke arnalǵan gaz quıý stansıalaryn salý máselelerin talqylady.
Memleket basshysynyń tapsyrmasyna sáıkes birinshi kezeńdi 2024 jyldyń jeltoqsanynda aıaqtaý josparlanýda. «Samuryq-Qazyna» UÁQ» AQ basshylyǵy merziminde úlgerýge daıyn ekendigin aıtty.
Jalpy, JEO-2-ni gazǵa aýystyrý birinshi kezeńdi iske qosý kezinde zalaldy shyǵaryndylar sanyn – 35 myń tonnadan 23 myń tonnaǵa deıin, 2026 jyly tolyq iske asyrý kezinde – 2,7 myń tonnaǵa deıin (jalpy 12 eseden astam) tómendetýge múmkindik beredi.
Bıyl JEO-2 jańa gaz stansıasyn jobalaý jáne salý boıynsha merdiger aıqyndalatyn bolady.
Elektr energetıkalyq holdıńtiń málimetinshe, ashyq halyqaralyq tenderdiń birinshi kezeńi barysynda 6 ótinim kelip tústi.
Onyń ishinde ekinshi, qorytyndy kezeńge 2 kompanıa ótti.
Tenderdiń jeńimpazy osy jyldyń ekinshi toqsanynda anyqtalady. Qurylys-montajdaý jumystarynyń bastalýy 2023 jyldyń tamyzyna boljanyp otyr.
Al JEO-2-niń gazǵa tolyq kóshirý 2026 jyldyń jeltoqsanynda aıaqtalady.
Atalǵan joba Úkimet bekitken Jol kartasy aıasynda júzege asyrylyp jatyr jáne Almaty qalasynda kómirden jylý jáne elektr energıasyn óndirýdi toqtatýǵa múmkindik beredi.
Sonymen qatar qalanyń qorshaǵan ortasyna shyǵaryndylardy aıtarlyqtaı qysqartady.
Qazir qalada magıstraldyq gaz qubyrlary bar, biraq halyq áli tolyq qosylmaǵan.
Erbolat Dosaevtyń sózinshe, 2023-2024 jyldar aralyǵynda qala tolyqtaı gazǵa kóshedi. Qazir Almatyda gaz tartý deńgeıi 99,2%.
Shyn máninde, kómirdi paıdalaný kólemi óte tómen, kómir bazalaryn negizinen Almaty oblysynyń turǵyndary paıdalanady.
Almaty oblysynyń ákimdigi JEO-2 jáne JEO-3-ti gazben qamtamasyz etý úshin Qarasaı aýdanynda 612 jer telimin satyp almaq.