Aqqýlar kólde emin-erkin júzip júr.
Haıýanattar baǵynyń jyly pavılonynda qystap shyqqan aqqýlar Almaty botanıkalyq baǵyndaǵy kóline oraldy, dep habarlaıdy Almaty-akshamy.kz.
Sý betinde júzgen qos aqqýdyń vıdeosy baqtyń jelidegi paraqshasyna shyqty. Aqqýlar baqttaǵy kóline 4 jyl buryn qonystanǵan bolatyn. Aqqýlar óte saq bolǵanymen, qala turǵyndarynan qoryqpaıdy. Qustar jubymen ǵana júredi. Jabaıy tabıǵatta 25 jylǵa deıin ómir súredi. Sulýlyqtyń, mahabbattyń sımvolyna aınalǵan pań aqqýlardyń janynda juby ajyramaı, birge júzip júrgen úırekterdi de kórýge bolady. Sonymen birge, botanıkalyq baqtyń ujymy aqqýlar men balyqtardy tamaqtandyrýǵa tyıym salynǵanyn habarlady.
«Botanıkalyq baqtaǵy balyqtar men aqqýlardy kútip-baptaý men qorektendirýge arnaıy jaldanǵan kásipqoılar kompanıasy jaýapty. Bul rette kúndelikti normasy bar qatań dıeta eseptelgen. Esińizde bolsyn, nan, pechene, chıpsy sıaqty qajetsiz taǵamdar aqqýlar men balyqtardy artyq salmaqqa, ashytýǵa, asqazannyń buzylýyna densaýlyǵynyń nasharlaýyna áser etýi múmkin. Ósimdikterge ǵana emes, bizdiń úı janýarlaryna da qamqor bolaıyq», - dep eskertti botanıkalyq baqtyń ujymy.