Ol úshin arnaýly "uıyqtaıtyn parta" da bar.
Endi balaqaılar úzilis kezinde kóz ilindirip alsa bolady, dep habarlaıdy aqshamnews.kz 24.kz-ke silteme jasap.
Mektepter zaman úderisinen qalmaýdy kózdeıdi. Jasandy ıntellektini de barynsha paıdalanyp keledi. Munyń bári balanyń ǵana emes, muǵalimniń de jumysyn jeńildetedi. Oǵan qosa, sabaqty qyzyq, mazmundy etip ótkizýge sep.
Uzaq ýaqyt tapjylmaı otyrý – buǵanasy bekimegen balalarǵa ońaı emes. Onyń ústine keıbiri alystan keledi. Erte turǵandyqtan uıqysy qanbaıdy. Kepteliste turyp taǵy sharshaıdy. Osynyń bári oqýshynyń densaýlyǵyna keri áser etýi múmkin. Endi 20 mınýttyq úziliste partalaryn sozyp, jatyp demalyp alady. Muny «uıyqtaıtyn parta» deıdi. Bıyl Almatydaǵy 15-gımnazıanyń bastaýysh synyptaryna túgeldeı osyndaı parta qoıyldy.
Raýan Janathanova, №15 gımnazıanyń muǵalimi:
Onyń ereksheligi – oqýshylar qońyraý kezinde 15-20 mınýt relaks mınýt ótkize alady. Iaǵnı jatqyzylǵan partalarda uıyqtaı alady. Qazir ǵana mine balalar uıyqtap turdy. Ol balalardyń densaýlyǵyna, sabaqta ózderin qalaı ustaýyna, sabaqtaǵy oqý úrdisine qalaı áser etetinin biz tájirıbede baqylap kóremiz.
Bilim oshaǵy Almatydaǵy ozyq úlgidegi mektepterdiń qatarynan. Bıyl 20 kabınet qaıta jańǵyrtyldy. Oǵan qosa, muǵalimder túgeldeı jasandy ıntellekti ádisterin sabaqta qoldaný boıynsha kýrstan ótken. Qazir paıdasyn kórip otyr. Árıne ol ustazdyń ornyn almastyrmaıdy, biraq jumysty jeńildetedi.
Bulbul Ospanbek, №15 gımnazıanyń dırektory:
Shveısarıada memorandýmǵa qol qoıǵannan keıin, mekteptiń ustazdary 100 paıyz osy kýrsty bitirdi. Barlyǵy emes, árıne, keıbireýinde keremet jetistikter bar. Keıbiri endi táı-táılap kele jatyr. Kez kelgen jumysymyz bolsyn senarı jazý, ǵylymı izdenis júrgizsek te, jáı muǵalim retinde sabaǵymnyń josparyn qursam da, ıntellekt meniń jumysymdy jaqsy jeńildetip bere alady.
Oǵan qosa, mektepte erekshe teatr jumys isteıdi. Sahnaǵa qajet zattar men kıimder oqýshylardyń óz qoldarynan shyqqan. Sondaı-aq, erekshe úlgidegi kitaphana men psıhologıalyq stýdıa bar.