Almatyda muqtaj otbasylardyń ómir súrý sapasyn jaqsartýǵa baǵyttalǵan 9 «Baqytty otbasy» ortalyǵy jumys isteıdi.
Mamandar qıyn jaǵdaıǵa tap bolǵan qala turǵyndaryna kómektesedi, trenıńter men konsýltasıalar ótkizedi. Bul týraly Almatydaǵy «Baqytty otbasy» ortalyǵynyń jetekshisi Zýlfıa Baısaqova Óńirlik komýnıkasıalar qyzmetiniń brıfıńinde málimdedi, dep habarlaıdy Almaty-akshamy.kz.
Aıta ketsek, kóp balaly jáne az qamtylǵan otbasylarǵa jan-jaqty kómek kórsetý maqsatynda 2019 jyldyń tamyzynan bastap Almatynyń ár aýdanynda «bir tereze» qaǵıdaty boıynsha «Baqytty otbasy» ortalyqtary jumys isteı bastady.
«Pandemıaǵa qaramastan, ortalyqtar sanıtarlyq-epıdemıologıalyq talaptardy eskere otyryp, jumysyn jalǵastyrýda. Munda kóp balaly jáne az qamtylǵan otbasylar zańgerlerden, áleýmettik qyzmetkerlerden jáne psıhologtardan tegin keńes ala alady», - dedi Z. Baısaqova.
Onyń aıtýynsha, ortalyqtarǵa kúnine 700-den astam qala turǵyny keledi.
«Baqytty otbasy» ortalyqtarynda aǵylshyn tilin úırený, makıaj, massaj, shashtaraz, pishý jáne tigin, gımnastıka, aspazdyq, toqý, sómke tigý boıynsha tegin kýrstar, kompúterlik kýrstar ótkiziledi. Kóp balaly jáne az qamtylǵan otbasylardyń balalary art-terapıa, gımnastıka, matematıka men logıka, shahmatpen aınalysýǵa, aǵylshyn tilin úırenýge, toqý kýrstaryna qatysýǵa jáne logopedpen keńesýge múmkindik alady.
«Baqytty otbasy» ortalyqtarynda 33 myń adam, onyń ishinde 2021 jyly 4 643 adam tirkelgen. Jyl basynan beri muqtaj 35 250 adamǵa resýrstyq, ádistemelik jáne 3 700 ótinish berýshige quqyqtyq kómek kórsetildi. 5 694 adam bala tárbıesi, kóshbasshylyq, otbasylyq qundylyqtar boıynsha bastapqy daıyndyqtan ótti», - dep jalǵastyrdy Z. Baısaqova.
Mesenattar «Baqytty otbasy» ortalyqtaryna kómek kórsetedi. Mysaly, demeýshilik qarajatqa azyq-túlik sebetteri, kıim-keshek, jeke gıgıena quraldary, 10 myńnan astam adamǵa arnalǵan oıynshyqtar satyp alyndy, 2300-den astam balanyń týrısik jáne mádenı oryndarǵa saıahat uıymdastyryldy, qaıyrymdy jandardyń qoldaýymen 370 adam turaqty jáne ýaqytsha jumysqa ornalasty.
Sonymen qatar, qalada «Bastaý bıznes» baǵdarlamasy boıynsha analarǵa kásipkerlik negizderin úıretýge baǵyttalǵan «İsker ana» jobasy, sondaı-aq «Eńbek» memlekettik baǵdarlamasy boıynsha qysqa merzimdi kýrstar júzege asyrylýda.
«İsker ana» baǵdarlamasy» tirkeý, quqyqtyq jáne psıhologıalyq kómek kórsetýden bastap kásipkerlik negizderi boıynsha kýrstarǵa jiberýge, bıznes-jospar qurýǵa, kásip ashýǵa, grant alýǵa nemese shaǵyn nesıe alýǵa deıin kóp balaly analarmen birtindep jumys jasaýdy usynady», - dedi Z. Baısaqova.
Bıyl joba demeýshileriniń arqasynda Áýezov aýdanynda qoldan jasalǵan toqyma jáne azyq-túlik ónimderin satatyn 4 saýda núktesi ashyldy. Túrksib aýdanynda kóp balaly analardyń qoldan jasaǵan buıymdaryn satý úshin «İsker Ana» saýda úıi ashyldy. Saýda úıi qazirgi zamanǵy ulttyq kıimderdi, quraq-kórpe, ulttyq naqyshtaǵy zergerlik buıymdardy, áıelderge arnalǵan kıimderdi usynady, sonymen qatar kıimderdi óńdeý men jóndeý boıynsha qyzmetter kórsetedi.
Sózin qorytyndylaǵan Z. Baısaqova bıyl «Óz bıznesińdi bastaý» baǵdarlamasy boıynsha 506 adam, onyń ishinde 290 kóp balaly otbasy jáne 216 az qamtylǵan otbasy músheleri «Atameken» UKP-nyń bazasynda túri kásip negizderi boıynsha bilim alǵanyn atap ótti.