Kásiporyn dırektorynyń aıtýynshy, oqys oqıǵaǵa sehtaǵy tehnıkalyq aqaý sebep bolǵan kórinedi
Almatydaǵy balmuzdaq shyǵaratyn zaýytta ótkir ıisti amıak tógilip, saldarynan 5 adam ýlandy, dep habarlaıdy Almaty-akshamy.kz Almaty.tv-ge silteme jasap.
Kásiporyn dırektorynyń aıtýynshy, oqys oqıǵaǵa sehtaǵy tehnıkalyq aqaý sebep bolǵan kórinedi. Al zardap shekken qyzmetkerler qazir aýrýhanada jatyr.
Ýlanyp aýrýhanaǵa túsken 5 qyzmetkerdiń qazir tórteýine stasıonarlyq em taǵaıyndalǵan. Dárigerlerdiń aıtýynsha, naýqastyń úsheýi qazir esin jıǵanmen, jansaqtaý bóliminde jatyr. Olardyń jaǵdaıy aýyr bolǵandyqtan, medısına qyzmetkerleriniń jiti baqylaýynda.
«Qalǵan bir naýqas toksıkologıa bóliminde em alyp jatyr. Jaǵdaıy ortasha-turaqty. Birinshi túsken kezde barlyǵynyń esi anyq boldy dep aıtpaımyn. Biraq qaı jerde bolǵanyn, qalaı kelgenin olar da aıtyp berdi. Búginde emdeýshi dárigerler naýqastarmen jumys júrgizip jatyr. Birtindep óz-ózderine kelgen soń aıta bastaıdy», – dedi qalalyq jedel shuǵyl kómek kórsetý aýrýhanasy qabyldaý bólimshesiniń bólim meńgerýshisi Baýyrjan Omarov.
Aýrýhanaǵa jetkende naýqastar esin bilmepti. Dárigerler amıak aýaǵa taraǵan sátte kásiporyn qyzmetkerleri seh ishinde qamalyp qalsa, til tartpaı keter edi deıdi. Al oqys oqıǵaǵa naqty sebep bolǵany ázirge belgisiz.
«Sebebin naqty aıta almaımyn. Bálkim tehnıkalyq aqaýdan bolar nemese qurylǵylar qysymdy kótere almady ma? Bilmeımin. Tipti, elektr jelisi úzildi me, ázirge túsiniksiz. Bir aıtarym, bul – 20 jyldyq tájirıbemizde birinshi ret tirkelgen jaǵdaı», – dedi kompanıanyń bas dırektory Vladımır Pak.
Qala aýmaǵyndaǵy bul zaýyttan balmuzdaqtan bólek, tushpara men ózge de taǵamdar shyǵarylady. Al «amıakty» sol ónimderdi daıyndaý barysynda qoldanatyn qurylǵylarǵa paıdalanady eken. Kompanıa dırektorynyń aıtýynsha, ótkir ıisti tússiz gaz tańǵa jýyq tógilgen.
Saldarynan 5 adam ýlanyp, es bilmeı aýrýhanaǵa túsken oqıǵaǵa qatysty tótenshelikter de, sanıtarlyq-epıdemıologıalyq baqylaý depatramentiniń ókilderi de jaýap bermedi. Al zaýyt qazir jumysyn jalǵastyryp jatyr.