Jýyrda 16 jasar Jansultan “Qazaqstan Respýblıkasy Konstıtýsıasynyń 30 jyldyǵyna baılanysty raqymshylyq jasaý týraly" zań boıynsha bostandyqqa shyqty.
Jansultannyń ata-anasy ajyrasyp, ol inilerimen kózi kórmeıtin ájesiniń qolynda qalady. Bala kóńil óziniń qurdastary sıaqty jaqsy kıinip, jaqsy tamaq ishýdi ańsaıtyn. Alaıda ájesiniń zeınetaqysy bir úıli janǵa jetpeıtin. Sóıtip áli oń-solyn tanyp úlgermegen 14 jasar Jansultan urlyq jasap, Almatydaǵy kámeletke tolmaǵandardy ustaýǵa arnalǵan qaýipsizdigi ortasha mekemesinen bir-aq shyqqan edi. Bas bostandyǵynan aıyrylǵan jasóspirim balalar kolonıasynda júrip mekeme ishindegi orta mektepte oqydy, sondaı-aq túrli tárbıelik is -sharalarǵa belsendi qatysqany jáne jaqsy minez-qulqy úshin marapattarǵa ıe bolǵan.
1 jyl 3 aıdan keıin raqymshylyqqa ilikken jasóspirimdi mekeme qyzmetkerleri zańda qarastyrylǵandaı jolaqysyn tólep, Mańǵystaý oblysyndaǵy turǵylyqty jerine ózderi jetkizip salýǵa alyp ketti.
Bostandyqqa shyqqan Jansultan temir torda júrip erkindiktiń qadirin túsingenin jáne bolashaqta durys ómir súretinin aıtyp, ózine tálimdi tárbıe bergen, jarqyn ómirge jol siltegen mekeme qyzmetkerleri men ustazdaryna alǵysyn tebirene jetkizdi.