Almaty qalasynyń Áýezov aýdanynda jol-kólik ınfraqurylymyn jańǵyrtý jáne qaýipsizdik deńgeıin arttyrý boıynsha júıeli jumys jalǵasyp jatyr.
Bul sharalar turǵyndardyń ómir súrý sapasyn jaqsartýǵa, kólik qoljetimdiligin arttyrýǵa jáne kóshelerdegi tártipti qamtamasyz etýge baǵyttalǵan. Bul týraly Almaty óńirlik komýnıkasıalar qyzmetiniń baspasóz konferensıasynda aýdan ákimi Abzal Egemberdıev málimdedi.
Bıyl 20 myń sharshy metr jol aǵymdaǵy jóndeýden ótkizilip, 10 myń sharshy metr tehnıkalyq trotýar tóseldi, sondaı-aq 5 shaqyrym aryq jelisi salyndy.
Qoǵamdyq kólik sapasyn arttyrýǵa da erekshe kóńil bólinýde. 2024 jyly avtobýs parki aıtarlyqtaı jańartylyp, kólik sany 1 325-ten 1 563-ke deıin kóbeıdi. Bul 8 jańa marshrýt ashýǵa, 13 qoldanystaǵy baǵytty jańartyp, kúsheıtýge múmkindik berdi. Nátıjesinde aýdannyń ártúrli bólikterinde qoǵamdyq kóliktiń turaqtylyǵy men qoljetimdiligi aıtarlyqtaı artty.
Sonymen qatar, quqyqtyq tártip pen qoǵamdyq qaýipsizdikti qamtamasyz etý sharalary da qatar júrgizilýde. 2024 jyly aýdan aýmaǵyna 153 «Sergek» aparattyq-baǵdarlamalyq kesheni men 1 027 beınebaqylaý kamerasy ornatyldy. Bul jol qozǵalysyn baqylaýdy kúsheıtip, quqyq buzýshylyqtar sanyn azaıtýǵa jáne tótenshe jaǵdaılarǵa jedel áreket etýge múmkindik berdi.
Osylaısha, Áýezov aýdany qalalyq ortany keshendi jańartýǵa batyl qadam jasap keledi. Kólik jáne ınjenerlik ınfraqurylymdy, qaýipsizdik júıelerin jáne qoǵamdyq kólikti aýqymdy túrde damytý – jaıly ári sapaly qalalyq ómirdiń jańa deńgeıin qalyptastyryp jatyr.