Almaty qalasy Áýezov aýdanynyń ákimi Abzal Egemberdıev áleýmettik saladaǵy jumystardyń nátıjeleri men halyqtyń túrli sanattaryna kórsetilip jatqan qoldaý sharalary týraly bólisti.
«Turǵyndardy áleýmettik qorǵaý — bizdiń basty jumysymyzdyń biri. Biz barlyq sanattaǵy azamattarǵa: kópbalaly otbasylarǵa, zeınetkerlerge, múmkindigi shekteýli jandarǵa, jastar men balalarǵa qoldaý kórsetemiz», — dedi Abzal Egemberdıev.
Aýdanda 15 túrli áleýmettik qyzmet kórsetiledi.
2025 jyldyń alǵashqy bes aıynda 174 otbasy (826 adam) 61 mln teńgelik ataýly áleýmettik kómek, 73 adam turǵyn úı kómegin aldy. Qorytyndylaı kele, 33 myń turǵynǵa 876 mln teńge kóleminde qarjylaı kómek kórsetildi.
Búgingi kúni aýdanda 49 myń zeınetker, 4,5 myń kópbalaly otbasy jáne 9,5 myń múmkindigi shekteýli azamat (onyń ishinde 1,5 myń — balalar) turady.
Aýdanda kelesi tórt áleýmettik joba júzege asyrylýda:
- «Baqytty otbasy» ortalyǵy — kópbalaly jáne az qamtylǵan otbasylarǵa qyzmet kórsetedi (qamtylǵan adam sany — 21 myń),
- «Shyńǵa Órleý» klýbynyń úsh fılıaly — áleýmettik osal toptaǵy otbasylardan shyqqan 640 balaǵa qosymsha bilim beredi,
- «Teń qoǵam» ortalyǵy — erekshe qajettilikteri bar 800-den astam azamatqa quqyqtyq, psıhologıalyq jáne áleýmettik kómek kórsetedi,
- «Belsendi uzaq ómir» ortalyǵynyń eki bólimshesi — egde jastaǵy turǵyndarǵa qyzmet kórsetedi (shamamen 60 myń adam).
«Bizde 41 myńnan astam stýdent turady. Jastarǵa arnalǵan keńistikti belsendi túrde damytyp jatyrmyz», — dedi Abzal Egemberdıev Almaty óńirlik komýnıkasıalar qyzmetiniń baspasóz konferensıasynda.
Aýdanda 5 joǵary oqý orny (Narhoz, Almaty tehnologıalyq ýnıversıteti, Halyqaralyq kólik-gýmanıtarlyq ýnıversıtet, Almaty gýmanıtarlyq-ekonomıkalyq ýnıversıteti, Almaty tehnıkalyq ýnıversıteti) men 18 orta arnaýly bilim berý uıymy jumys isteıdi.
Aýdan jastaryna arnalǵan Komúnıtı-ortalyq bar. Bul jastarǵa keshendi áleýmettik-quqyqtyq, qoǵamdyq jáne bos ýaqytty tıimdi ótkizýge baǵyttalǵan qyzmetter usynady. Jyl saıyn munda 10 myńnan astam stýdent túrli qyzmetter alady.
«Mektep jasyndaǵy balalardyń damýyna keler bolsaq, búginde «DamuBala» memlekettik shyǵarmashylyq jáne sporttyq tapsyrys baǵdarlamasy sátti júzege asyrylyp jatyr. Baǵdarlama aıasynda 18 myńnan astam bala 15 sporttyq jáne 18 shyǵarmashylyq baǵytpen qamtylǵan», — dep atap ótti aýdan ákimi.
Bul baǵdarlama — balalardyń bos ýaqytyn uıymdastyrý men jeke damýyna arnalǵan mańyzdy qural. Osyǵan baılanysty kelesi jyly bul baǵyttaǵy jumys jalǵasatyn bolady.
2025 jyldyń basynan bastap «Damu Bala» baǵdarlamasyna 8 683 bala qatysyp, 9 871 vaýcher paıdalanyldy (sport — 4 632, shyǵarmashylyq — 5 239).
2025 jylǵy 27 maýsymdaǵy jaǵdaı boıynsha aqparattyq júıede 5 384 bala tirkelip, 5 604 vaýcher tirkelgen, onyń ishinde sportqa — 2 470, shyǵarmashylyqqa — 3 134.
«Fare Face» baǵdarlamasynda 1 516 bala tirkelgen, bul jalpy qamtylǵan balalardyń 27% (sporttyq tapsyrys — 731, shyǵarmashylyq — 785).