Almaty qalasy Almaly aýdanynyń tórt aýlasynda aǵymdaǵy jóndeý jumystary aıaqtaldy, dep habarlaıdy almaty-akshamy.kz
Qabanbaı batyr kóshesi, 137 aýlasynda oıyn alańdary men zamanaýı trenajerler ornatyldy.
Qaraǵaılar men butalar otyrǵyzylyp, jańa oryndyqtar qoıyldy, Qazybek bı kóshesi, 85 mekenjaıyndaǵy aýlada jaryq júıesi jóndeldi.
Bul úıde 30 jyldan astam ýaqyt turǵan aýdan turǵyny Gúlmıra Dýgashovanyń aıtýynsha, olardyń aýlasy ózgerdi. «Qala ortalyǵynda tursaq ta, aýlada bos jer bar edi, jasyl jelekter jetispedi. Qazir ádemi kógal jasalyp, jańa tamasha oıyn alańy paıda boldy. Negizi bul aǵymdaǵy jóndeý, biraq menińshe, kúrdeli jóndeýge uqsaıdy. Bul úshin kóp rahmet. Adamdar bizdiń aýlaǵa tań qalady», - dedi aýdan turǵyny Gúlmıra.
Shagabýtdınov kóshesi, 171 mekenjaıynda balalarǵa arnalǵan jańa shaǵyn sáýlet nysandary ornatyldy.
Bıyl Almaly aýdanynda 33 aýla jóndeldi. Qazir 11 mekenjaıda jumys júrip jatyr. Aǵymdaǵy jóndeý barysynda jyl sońyna deıin 50 aýla jańartylady.
Ár aýlanyń rekonstrýksıasy ártúrli. Bastysy, turǵyndardyń tilegine basymdyq beriledi. Munyń barlyǵy qala turǵyndarynyń bos ýaqytyn jaıly ótkizýi úshin jasalyp otyr.
Almaty qalasynda barlyǵy 3231 aýla aýmaǵy bar. Onyń 380 aýlasynda jyl sońyna deıin kúrdeli jáne aǵymdaǵy jóndeý jumystary aıaqtalady.