Almatydaǵy atys oqıǵasyna kináli adam 20 jylǵa deıin nemese ómir boıy bas bostandyǵynan aıyrylýy múmkin
Almatydaǵy atys boıynsha eki qylmystyq is qozǵaldy. Bul týraly brıfıń barysynda qalalyq polısıa departamentiniń basshysy Qanat Taımerdenov málim etti, dep habarlaıdy Almaty-akshamy.kz.
QazAqparat agenttiginiń aqparaty boıynsha, kúdikti ýaqytsha ustaý ızolátoryna qamaldy. Odan jaýap alynyp jatyr. Málimetter anyqtalýda.
Qanat Taımerdenovtyń sózinshe, kúdiktiniń atyna qarý 2008 jyly tirkelgen, ol psıhıatrıalyq dıspanserde esepte joq. Onyń aıtýynsha, vedomstvoaralyq jedel top quryldy, aldaǵy ýaqytta tergeý nátıjeleri boıynsha polısıa tolyq aqparat beretin bolady.
«Qyzmet barysynda qaza bolǵan polısıa qyzmetkerleriniń otbasylaryna kómek kórsetiledi. Olardyń kámelettik jasqa tolmaǵan balalary bar»,- dedi spıker.
Buǵan deıin Baqytjan Saǵyntaev olardyń otbasyna tıisti kómek kórsetiletini týraly aıtqan bolatyn. Keıinirek Jeke sot oryndaýshylarynyń palatasy oqıǵaǵa qatysty túsinikteme berdi. Aıta keteıik, osyǵan deıin Almatyda atys bolyp, 5 adamnyń qaza tapqanyn habarlaǵan bolatynbyz. Atalǵan jaǵdaı boıynsha sotqa deıingi tergeý amaldary bastaldy. Kináli adam 20 jylǵa deıin nemese ómir boıyna bas bostandyǵynan aıyrylýy múmkin.