Bıyl tuńǵysh ret «Almatydaǵy altyn kúz «Qazaqkonsertpen» birge» óner festıvali ótedi. Atalmysh joba KSRO men Qazaqstannyń Halyq ártisi, «Halyq qaharmany» Roza Tájibaıqyzy Baǵlanovanyń 100 jyldyǵy aıasynda josparlanyp otyr, dep habarlaıdy Almaty-akshamy.kz Almaty.tv-ge silteme jasap.
Roza Baǵlanova uzaq jyldar boıy Almatyda eńbek etken. «Qazaqtyń bulbulyna» qanat bitirip, mýzyka óneriniń bıigine sharyqtaýyna shabyt bergen Almaty qalasy desek, artyq bolmas. Sondyqtan «Qazaqkonserttiń» shyǵarmashylyq ujymy Roza Tájibaıqyzy erekshe jaqsy kórgen Almaty qalasyndaǵy birqatar mádenıet uıymdarynda aýqymdy merekelik sharalar ótkizýdi josparlap otyr.
Festıvál shymyldyǵy 25 qyrkúıek kúni Qurmanǵazy atyndaǵy Qazaq ulttyq konservatorıasynyń Erkeǵalı Rahmadıev atyndaǵy úlken konsert zalynda «Bizdiń jármeńke» atty dástúrli mýzyka konsertimen ashylady. Konsertke Ulttyq óner ortalyǵy men Qurmanǵazy atyndaǵy Qazaq ulttyq konservatorıasynyń solıseri men ujymdary, «Astana sazy» fólklorlyq ansambli men «Gúlder» ansambliniń jańa quramy qatysady.
27 qyrkúıekte Abaı atyndaǵy Qazaq ulttyq opera jáne balet teatrynda «Klasıkalyq mýzyka jaýharlary» atty klasıkalyq mýzyka konserti ótedi. Konsertte eń tanymal kameralyq-aspaptyq ansámblderdiń biri «Forte Trio», Qazaqstannyń eńbek sińirgen qaıratkerleri Azamat Jeltyrgýzov, Bıbigúl Januzaq, Medet Chotabaev, Saltanat Ahmetova, «Daryn» memlekettik jastar syılyǵynyń laýreaty Azat Málik jáne halyqaralyq jáne respýblıkalyq baıqaýlardyń laýreaty Aıgerim Altynbek óner kórsetedi.
Óner festıvali 6 qazanda Álim Beısembaevtyń Jambyl atyndaǵy Qazaq memlekettik fılarmonıasynyń Memlekettik akademıalyq sımfonıalyq orkestrimen birlesken konsertimen jalǵasady. Orkestrge Qanat Omarov dırıjerlik etedi. Álim Beısembaev - Anglıanyń Lıds qalasynda ótken HH fortepıanoshylar baıqaýynyń jeńimpazy, «Ýoterman» altyn medaliniń ıegeri.
20 qazanda Almaty Theatre-da belgili estrada ártisteriniń qatysýymen «Almatym júregimde» gala-konserti ótedi. Sharada almatylyqtar úshin halyqtyń súıiktilerine aınalǵan «Qazaqkonserttiń» solıseri Qazaqstannyń halyq ártisi, Qazaqstannyń Eńbek Eri Roza Rymbaeva, Qazaqstannyń halyq ártisteri Altynbek Qorazbaev, Maqpal Júnisova, Qazaqstannyń eńbek sińirgen ártisteri Baǵdat Sámedınova, Aıjan Nurmaǵambetova, Qazaqstannyń eńbek sińirgen qaıratkerleri Janna Orynbasarova, Qurmash Mahan, halyqaralyq jáne respýblıkalyq baıqaýlardyń laýreattary Rýhıa Baıdúkenova, Raıym Ýaıys, Alıbek Álmadıev, Saltanat Meńdiǵalıeva, Dıdar Ábdýhalyq, Gúlsim Myrzabekova, Erbol Narımanuly, sondaı-aq «Azıa» jáne «Melomen» toptary óner kórsetedi.
Festıvál aıasynda elimizdegi jáne Ortalyq Azıadaǵy tuńǵysh ári jalǵyz memlekettik múzıkl teatry «Astana Musical» alǵash ret almatylyq kórermenderine barlyq qoıylymdaryn sahnalamaq. 25 qazan kúni «Nursultan Nazarbaev qorynyń» konsert zalynda «Sıqyrly sazdy hor-konsert» konsert-spektakli, 26 qazan kúni «№13» komedıasy qoıylady.
27 qazanda Almaty Theatre-da almatylyq kórermender «Dostar serti» múzıklin tamashalap, 70-jyldardaǵy konservatorıanyń shyǵarmashylyq álemine saıahat jasaıdy. 28 qazanda «Nursultan Nazarbaev qorynyń» konsert zalynda urpaqtar arasyndaǵy qarama-qaıshylyq, óskeleń urpaqtyń máseleleri, oqýshylardyń qorshaǵan ortamen qarym-qatynasy sıaqty ózekti taqyryptardy qozǵaıtyn «ENT tapsyrmaımyn» dramasyn tamashalaı alady.
Sonymen qatar, KSRO men Qazaqstannyń Halyq ártisi, «Halyq qaharmany» Roza Tájibaıqyzy Baǵlanovanyń 100 jyldyǵyna oraı 29 qazan kúni Almaty Theatre-da «Astana Musical» memlekettik teatry osy jyldyń basty premerasy - «Roza Baǵlanova» múzıklin sahnalaıtyn bolady.