Ójet shaǵynaýdanynda 1,1 shaqyrym ortasha jol jóndeý jumysy júrgizildi
Almaty ákimimen ótken kezdesýdiń mańyzy zor. Búgin biraýyzdan osyndaı pikir aıtqan Alataý aýdanynyń turǵyndary qala basshysyna rızashylyqtaryn bildirdi, dep habarlaıdy Almaty-akshamy.kz Almaty.tv-ge silteme jasap.
Óıtkeni dittegenderine jetip, suraǵandary aldynan tabylǵan. Búginniń ózinde kezdesýde kóterilgen 90 shaqty suraqtyń 70-si sheshilgen.
Alataý aýdanyna qarasty Jádiger kóshesinde júrginshilerge arnalǵan trotýar joq. Kesirinen oıyn balalary úshin munda serýendeý turmaq, jolda júrýdiń ózi qaýipti edi. Oǵan qosa, asfált ábden eskirgendikten, kóp jeri shuryq tesik bolǵan. Endi qazir bul mań taqtaıdaı tep-tegis. Alataý aýdany ákimdigi Jádiger kóshesinen bastap № 184 mektepke deıingi aralyqqa ortasha jol jóndeý jumystaryn júrgizgen.
«Myna joldy jóndep berip jatyr. Adam júre almaıtyn. Allaǵa shúkir, mine trotýar jasady. Qansha eńbek. Tańnyń atysy, kúnniń batysyna deıin jumys istep jatyr. Alladan qaıtsyn! «Jaqsynyń jaqsylyǵyn aıt, nury tasysyn» deıdi. Asfált tósegen kezde kisiler saǵat 23:00-ge deıin jumys istedi», – dedi qala turǵyny Kenjebaı Hasen.
Jol máselesi Ójet shaǵynaýdanynda da bolǵan. Osyǵan deıin eldi-mekendi ortalyq sý jáne káriz júıesine jappaı qosý úshin qubyr júrgizildi. Jumys júrý úshin jer qazylyp, halyqqa biraz ýaqyt qolaısyzdyq týdyrǵany ras. Endi barlyq tıisti júıe tartylǵan soń ákimdiktegiler kóshelerge asfált tósedi.
«Batpaq bolady. Mashınamen júrýge, balalar oınaýǵa eshqandaı múmkindik bolmaǵan. Qazir asfált tóseldi. Durys boldy», – dedi qala turǵyny Appaz Dúıseev.
«Kósheni jóndep berdi. Sózimizdi jerge qalǵan joq, aıtyldy, oryndaldy. Biz qýanyshtymyz. Alǵys aıtamyz», – dedi qala turǵyny Arzygúl Gapparova.
«Ójet shaǵynaýdanynda 1,1 shaqyrym ortasha jol jóndeý jumysy júrgizildi. Bıyl Ójet shaǵynaýdanyn 100 paıyz qamtyldy», – dedi Alataý aýdandyq komýnaldy sharýashylyq bóliminiń bas mamany Qýatbek Maqashev.
Ata-ananyń da jan aıqaıy eskerýsiz qalmady. Joldy jıi kesip ótetin oqýshylardyń qaýipsizdigi úshin Alataý aýdanynda qazirdiń ózinde 6 baǵdarsham ornatyldy. Sonyń tórteýi Momyshuly kóshesine qoıylǵan. «Kezdesýde kóterilgen máselelerdiń eshqaısysy eskerýsiz qalmaıdy» deıdi Alataý aýdany ákimdigi.