Almatyda Abaı dańǵylynyń kólik magıstrali boıynsha jol jumystary kestege sáıkes júrgizilip, oqý jyly bastalǵanǵa deıin aıaqtalady.
Qazirgi ýaqytta Dostyq dańǵylynan Naýryzbaı batyr kóshesine deıin batys baǵytta jáne Tilendıev kóshesinen Áýezov kóshesine deıin shyǵys baǵytta jóndeý jumystary aıaqtalyp, qozǵalys ashyldy, dep habarlaıdy Almaty-akshamy.kz.
Kelesi kezeń-Abaı dańǵylyndaǵy Naýryzbaı batyr kóshesinen Baıtursynuly kóshesine deıingi ýchaskedegi ortasha jóndeý. Jol qozǵalysynyń qaýipsizdigin qamtamasyz etý úshin 15 shildedegi saǵat 23-00-den 17 shildedegi saǵat 06-00-ge deıin dańǵyldyń soltústik jaǵymen tolyq jabylatyn polımerli asfáltbeton tóseý jumystary júrgiziletin bolady.
Jabyq ýchaskeni aınalyp ótý Shevchenko kóshesi, Qurmanǵazy kóshesi, Baıtursynuly kóshesi, Seıfýllın dańǵyly, Naýryzbaı batyr kóshesi jáne Sátbaev kóshesi arqyly júzege asyrylady. Naýryzbaı batyr kóshesi, Seıfýllın dańǵyly, Baıtursynov kóshesi boıyndaǵy kóliktiń ótpeli qozǵalysy kúndizgi ýaqytta qoljetimdi bolady.
15 shilde saǵat 23-00-den 17 shilde saǵat 06-00-ge deıin Masanshy kóshesinen ońtústik baǵytta Abaı dańǵylyna ótý shekteledi, aınalma jol Qurmanǵazy kóshesi men Shevchenko kóshesi boıynsha uıymdastyrylady.
Jol-kólik oqıǵalaryn boldyrmaý jáne jol qozǵalysyn uıymdastyrý úshin joǵaryda atalǵan kóshe ýchaskesinde patrúldik polısıa polkiniń 3 ekıpajy jumyldyrylatyn bolady.
Jóndeý jumystaryn júrgizý ýchaskeleri týraly ózekti aqparat Qala ákimdigi men qalalyq mobıldilik basqarmasynyń resmı betterinde, sondaı-aq GAJ 2-qosymshasynda qoljetimdi bolady.
Esterińizge sala keteıik, Almatydaǵy magıstraldyq kóshelerdiń jol tósemin jóndeý jumystary alǵash ret jańa tehnologıalardy qoldanýmen júrgizilýde. Asfáltbetondardyń quramynda polımerler qoldanylady. Mundaı qospalar tozýǵa tózimdi, jumsartý temperatýrasy joǵary (65-70°C), sondyqtan ystyqqa kóp áser etpesten ońaı tótep bere alady, áldeqaıda uzaǵyraq qyzmet etedi – Qazirgi 5 jyl jumys isteýdiń ornyna 8-10 jyl.
Jóndeý jumystary 2023 jylǵa josparlanǵan jumystar aıasynda júrgizilýde. Ýaqytsha qolaısyzdyqtar úshin keshirim suraımyz. Bul qalanyń joldary bizge uzaǵyraq qyzmet etýi úshin qajetti shara. Marshrýtty aldyn ala túzetýdi suraımyz.