Komedıa men ekshn qatar júretin romantıkalyq drama balalar úıinen shyqqan qos ǵashyqtyń aýyr taǵdyrynan syr shertedi.
Jańa kartınadaǵy basty rolderdi elimizge tanymal akterler oınaıdy. Jańa kınonyń alǵashqy túsiriliminde rejıser Alóna Almaz dástúrli túrde tárelke syndyrdy, dep habarlaıdy Almaty-akshamy.kz 24.kz-ke silteme jasap.
«Urlyqshylar» dep atalatyn kartınada qos jetimniń úlken qaladaǵy ómir qıyndyqtary, shytyrman oqıǵalary sýretteledi. Tiger Films prodúserlik kompanıasynyń ujymy Nú-Iork kınoakademıasynyń túlegi Alóna Almazdyń otandyq kınoǵa qosar úlesi mol ekenine senimdi.
«Men otandyq kınoǵa batystyń túisirilim tehnologıasyn alyp kelgim keledi. Osylaısha kórermenderdiń otandyq kınoǵa degen qyzyǵýshylyǵyn arttyrýdy kózdeımin. Qazir batys fılmderine degen suranys joǵary. Tym bolmasa tarazynyń eki basyn teńestirý de nátıje. Óıtkeni, qazir jaqsy otandyq fılmder túsirilip jatyr», - deıdi rejıser Alena Almaz.
Fılm balalar úıinde tárbıelengen Ámir men Sana esimdi keıipkerlerdiń ómirine qurylǵan. Olar ashtyqpen kúresý úshin urlyq jasap ósedi. Mektep bitirgen soń Ámir men Sana baǵaly zattardy jymqyrýǵa bet burady. Baılardan urlap alǵanyn muqtajdarǵa taratyp beredi. Jetimder ómirindegi shytyrman oqıǵa osylaı bastalady.
«Aýyr, biraq óte qyzyqty rol. Shynymdy aıtsam, meniń keıipkerim «eń súıikti» keıipkerim dep aıta alamyn. Osyǵan deıin túsken keıipkerlerimniń arasynda. Sol úshin men tyrysyp jatyrmyn. Rejıserdiń kómegimen, komandanyń kómegimen. Biz daıyndaldyq. Kádimgideı bir jarty aıdaı daıyndaldyq», - deıdi aktrısa Áıgerim Júnisova.
Fılmdegi ekstremaldy qımyldardy akterlerdiń ózderi oryndaıdy. Jańa kartına Kinopark & Kinoplexx kınoteatrlarynan 18 qańtardan bastap kórsetiledi.