Úsh kún ishinde 211 zańsyz saýda orny alynyp tastaldy.
Almatyda qala ákimi Erbolat Dosaevtyń tapsyrmasymen memlekettik qordyń jerinde ornalasqan ruqsatsyz salynǵan saýda oryndary men stasıonarlyq emes saýda nysandaryn (SESN) buzý jumystary bastaldy, dep habarlaıdy aqshamnews.kz
Bul sharanyń maqsaty – retsiz saýdamen kúres jáne qala keńistigindegi qaýipsizdikti arttyrý.
Úsh kún ishinde memlekettik jáne quqyq qorǵaý organdarynyń ókilderi, máslıhat depýtattary men qoǵamdyq keńes múshelerinen quralǵan komısıa 211 zańsyz saýda ornyn (102 dúńgirshek jáne 109 kúsh ólshegish) buzyp, 270 kásipkerge eskertý hat berildi.
Aıta ketý kerek, qyzmet túrine qaramastan, barlyq zańsyz saýda nysandary buzylýda. Ásirese, kóshe taǵamdaryn satatyn oryndarǵa erekshe nazar aýdarylýda. Mundaı birneshe nysan, atap aıtqanda, Abaı dańǵylyndaǵy memlekettik sırk mańynda súrildi. Atalǵan saýda oryndary ınjenerlik jelilerge, elektr energıasyna qosylmaǵan, kóriktendirý erejelerin buzady. Qala turǵyndary mundaı jerlerde tamaq satyp alý densaýlyqqa qaýipti ekenin aıtýda.
«Zańsyz dúńgirshekter kóbinese aryqtardyń ústine qoıylady, sanıtarlyq norma saqtalmaǵan, dárethana joq. Olar mektepterdiń, balalar júretin oryndardyń janynda ornalasqan. Keıin tamaqtan ýlanýy ǵajap emes», – deıdi qala turǵyny Evgenıı Bogachev.
Qalanyń máslıhat depýtaty, kóriktendirý máselelerimen belsendi aınalysyp júrgen Tımýr Eleýsizov buzylǵan saýda oryndarynyń barlyǵy elektr jelilerine zańsyz qosylǵanyn, bul qalanyń ınfraqurylymyna qosymsha júkteme túsiretinin atap ótti.
«Bul qalanyń elektr jelilerine artyq júkteme túsiredi. Olardyń qyzmetin retteý úshin osyndaı bastamalardy qoldaý qajet», – dedi ol.
Eske sala keteıik, Almaty ákimdiginiń 2024 jyly 27 tamyzdaǵy №3/469 qaýlysyna sáıkes, qala aýmaǵynda 157 SESN ornalastyrýǵa arnalǵan 142 oryn bekitilgen.
Kásipkerlik qyzmetin zań aıasynda jalǵastyrǵysy keletin kásipkerler Almaty qalasynyń Kásipkerlik jáne ınvestısıalar basqarmasyna 390 21 30 telefony arqyly júgine alady.
Jalpy, Almatyda barlyǵy 500-ge jýyq zańsyz nysan buzylmaq. SESN-dy anyqtaý jáne súrý jumystary jalǵasady.