Memlekettik qor jerinde zańsyz ornatylǵan stasıonarlyq emes saýda nysandaryn (ári qaraı – SESN) joıý jáne retsiz saýdamen kúresý maqsatynda Almaty qalasynyń Kásipkerlik jáne ınvestısıalar basqarmasy 2025 jyldyń 27 qańtary men 17 aqpany aralyǵynda SESN jappaı buzý jumystaryn josparlap otyr, dep habarlaıdy aqshamnews.kz
Qalanyń barlyq aýdanynda arnaıy jumys komısıasy quryldy. Olardyń quramyna memlekettik organdardyń, Almaty qalasy Polısıa departamentiniń ókilderi, máslıhat depýtattary, Qoǵamdyq keńes músheleri jáne «Atameken» QR UKP ókilderi kirdi. Sonymen qatar qala prokýratýrasy kóshe saýdasynyń zańdylyǵyn qamtamasyz etý boıynsha sharalardy kúsheıtti.
Buzý barysynda ınjenerlik-kommýnıkasıalyq jelilerden, elektr qýatynan jáne sýmen jabdyqtaý júıelerinen ajyratý kózdelgen. Polısıa departamenti aýdan ákimdikterimen birlese otyryp, súrý ornynda qoǵamdyq tártip pen qaýipsizdikti qamtamasyz etedi.
Búginde qalada memlekettik qordyń jerinde 500 jýyq zańsyz ornatylǵan SESN bar. Olar boıynsha erikti túrde buzý kerektigi jaıly eskertýlerdi berý jumystary bastaldy. SESN-nyń alǵashqy 200-den astam ıesi jazbasha eskertý aldy.
Eske sala keteıik, Almaty qalasy ákimdiginiń 2024 jylǵy 27 tamyzdaǵy №3/469 «Almaty qalasy aýmaǵynda stasıonarlyq emes saýda nysandaryn ornalasý ornyn anyqtaý jáne bekitý týraly» Qaýlysyna sáıkes, qalada 157 SESN ornalastyrýǵa arnalǵan 142 oryn bekitilgen. Stasıonarlyq emes saýda nysandarynda zańdy negizde qyzmetin jalǵastyrýǵa nıet bildirgen kásipkerler Almaty qalasynyń Kásipkerlik jáne ınvestısıalar basqarmasyna 390 21 30 telefony arqyly habarlasa alady.
Sonymen qatar, qalada retsiz saýda deńgeıin tómendetý boıynsha jumystar júrgizilýde. Monıtorıń nátıjesinde qalanyń 49 jerinde retsiz saýdanyń jappaı shoǵyrlanǵan oryndary anyqtaldy (iri bazarlar, saıabaqtar men alańdardyń mańynda), bul jerlerde 1,2 myńnan astam saýdager zańsyz ornalasqan. Retsiz saýdaǵa qatysty QR ÁQBtK-niń 204-baby («Belgilenbegen oryndarda saýda jasaý») jáne 505-baby («Qalalar men eldi mekenderdiń aýmaqtaryn abattandyrý erejelerin buzý») boıynsha ákimshilik sharalar qoldanylady. 2024 jyly polısıamen birlesken reıdter barysynda 1,9 myńnan astam retsiz saýda sýbektisine ákimshilik jaýapkershilik júkteldi.
Anyqtama úshin:
Almaty qalasynyń Kásipkerlik jáne ınvestısıalar basqarmasy E-ótinish platformasynda, Open Almaty jáne áleýmettik jelilerde turǵyndardyń shaǵymy men ótinishi boıynsha júrgizgen monıtorıń barysynda zańsyz ornatylǵan SESN tarapynan kóriktendirý erejelerin, órt qaýipsizdigi jáne sanıtarlyq normalardy buzý, nysandardyń dızaın-kodqa jáne qalanyń estetıkalyq kelbetine sáıkes kelmeý faktileri anyqtaldy.
Eske sala keteıik, «Almaty qalasynyń aýmaǵynda jáne qala mańy aımaǵynda stasıonarlyq emes saýda nysandaryn ornatý qaǵıdalaryna» sáıkes, saýda nysandary jer telimin jalǵa alý quqyǵy týraly shart negizinde ornatylýǵa tıis. Myna silteme arqyly erejemen tolyǵyraq tanysýǵa bolady: https://adilet.zan.kz/rus/docs/V23R0001707