ÓKQ alańynda Almaty qalasy boıynsha Ekonomıkalyq tergeý departamenti ókilderiniń qatysýymen brıfıń ótti. Spıkerler keltirgen málimetterge sáıkes, jyl basynan beri oıyn bıznesi salasynda sotqa deıingi 12 óndiris tirkelgen. Úsh oıyn zalynyń, bir býkmekerlik keńseniń jáne tórt jasyryn kazınonyń qyzmeti toqtatyldy, dep habarlaıdy almaty-akshamy.kz
Sonymen qatar, 94 kompúterlik tehnıka zańsyz aınalymnan alyndy, sot úkimi boıynsha 500-den astam oıyn termınaly joıyldy. Sonymen qatar, aǵymdaǵy jyly «TıkTok» áleýmettik jelisinde zańsyz qumar oıyndardy uıymdastyrýshylardyń qyzmeti toqtatyldy.
Memlekettik organda oıynǵa táýeldiliktiń qurbandary kóbinese jastar ekendigi, al zańsyz oıyn bıznesine qarsy kúrestiń nátıjesi kóbinese turǵyndardyń sanasyna baılanysty ekendigi atap ótilgen.
«Ońaı» aqshany lezde utyp alamyn degen úmitpen adamdar kóbinese kazıno men avtomattarǵa tapqan tabysy men baryn qaldyrady. Jedel-tergeý tájirıbesi kórsetkendeı, anyqtalǵan jasyryn kazınolar men oıyn mekemelerine negizgi kelýshiler jastar bolyp otyr. Zańsyz oıyn bıznesi memlekettik búdjetke eshqandaı paıdasy joq jáne sonymen birge qala turǵyndarynyń da qaltasyn qaǵady. Halyqtyń qumar oıyndardan bas tartýy qaskúnemderdi zańsyz tabystarynan aıyrady», - dedi Almaty qalasy boıynsha Ekonomıkalyq tergep-tekserý departamentiniń tergeý basqarmasynyń basshysy Sáken Qondybaev.
Jedel-tergeý is - sharalary barysynda zańsyz oıyn bıznesin uıymdastyrýdyń eki faktisi anyqtaldy, atap aıtqanda, stavkalardy qabyldaý, banktik aýdarymdar arqyly utystardy esepteý jáne berý fýnksıalaryn qoldaıtyn onlaın qumar oıyndar. Uıymdastyrýshylar 4 jylǵa bas bostandyǵynan aıyryldy.
Sonymen qatar, qalanyń eki turǵyny zańsyz oıyn bıznesi salasyndaǵy osyndaı quqyq buzýshylyqtar úshin 1,6 jylǵa bas bostandyǵyn shekteýge sottaldy.
«Búgingi tańda kazınolar men oıyn avtomattary zaldary tek Qapshaǵaı sý qoımasynyń jaǵalaýynda jáne Aqmola oblysynyń Shýche aýdanynda ornalastyrylýy tıis. Osylaısha, atalǵan aýmaqtardan tys jumys isteıtin barlyq oıyn mekemeleri óz qyzmetin zańsyz júzege asyrady», - dep eskertti ol.
Memlekettik organnyń ókili sondaı-aq zańsyz oıyn bıznesine qarsy is-qımyl jurtshylyqpen birlesken kúsh-jigermen, onyń ishinde profılaktıkalyq is-sharalar júrgizý arqyly kórsetilýi qajet ekenin atap ótti.
Osylaısha, Almaty qalasynyń Ekonomıkalyq tergeý departamentinde kásipkerlerdi, qoǵamdyq uıymdardyń, blogerler men BAQ ókilderin zańsyz oıyn bıznesimen kúreske qosylýǵa shaqyrady.