Polısıa eki kúnde 340 kelimsekti jaýapqa tartypty.
Almaty polısıasy zańsyz kelimsekterge qatysty is-shara júrgizýde, dep habarlaıdy Almaty-akshamy.kz Polisia.kz-ke silteme jasap.
Jedel aldyn alý is-sharasy shaharda zańsyz júrgen adamdardy anyqtaýǵa, sondaı-aq qaladaǵy kóshi-qon arnalaryn toqtatýǵa baǵyttalǵan. İs-shara aıasynda polıseıler kelimsekterdiń ýaqytsha turatyn jerlerin, qurylys alańdaryn, jertólelerdi, sondaı-aq azamattardyń jappaı jınalatyn jerlerin – bazarlardy, temirjol mańyndaǵy aýmaqtardy, kólik turaqtaryn, saıajaılar men óndiristik aımaqtardy tekserýde.
«Eki kúndik reıd kezinde QR kóshi-qon zańnamasyn buzǵan 507 quqyq buzýshy anyqtaldy jáne jaýapkershilikke tartyldy, olardyń 340-y - shetel azamattary. Sot sheshimimen kórshi memleketterdiń 44 azamaty elden shyǵaryldy», – deıdi Almaty qalalyq polısıa departamenti kóshi-qon qyzmeti basqarmasy bastyǵynyń orynbasary Gennadıı Men.
Sondaı-aq, spıker sheteldikterdiń QR-da bolýynyń zańdylyǵyn qamtamasyz etý sharalaryn qabyldamaǵany úshin Qazaqstannyń 145 laýazymdy jáne zańdy tulǵalary ákimshilik jaýapkershilikke tartylǵanyn atap ótti.
Sonymen qatar, sheteldik jumys kúshin tartý erejesin buzǵany úshin 22 jumys berýshi jaýapqa tartyldy.