Búgin Almaty qalalyq polısıa departamentiniń májilis zalynda Almaty qalalyq Sybaılas jemqorlyqqa qarsy qyzmeti polısıa departamentimen birlese uıymdastyrǵan dáristik shara ótti.
Jıyn "Zań men Tártip ózińnen bastalady!" uranymen ótti jáne adaldyq, ádildik jáne áleýmettik jaýapkershilik qundylyqtary týraly ashyq jáne mazmundy áńgimelesý alańyna aınaldy, dep habarlaıdy aqshamnews.kz Polisia.kz-ke silteme jasap.
İs-sharanyń negizgi maqsaty – sybaılas jemqorlyqqa múldem tózbeýshilik ıdeologıasyn damytý, quqyqtyq sanany kúsheıtý, zań men zańdylyq qaǵıdattaryn qurmetteýge tárbıeleý.
- Búgingi kúni árbir azamattyń zańnyń saqtalýyna jeke jaýapkershiligin sezinýi burynǵydan da mańyzdy bolyp otyr. Qoǵamda qoldaý men senim bolǵan kezde polısıa jumysy nátıjeli bolady. Biz qaýipsizdik pen tártipti saqtaý úshin ashyq dıalogqa, birlesken jumysqa daıynbyz, — dedi Almaty qalalyq polısıa departamentiniń bastyǵy Arystanǵanı Zapparov.
Almaty qalasy boıynsha sybaılas jemqorlyqqa qarsy qyzmettiń basshysy Arman Rahımov aldyn alýdyń qajettiligin atap ótti. "Sybaılas jemqorlyqtyń saldarymen kúreskennen góri onyń aldyn alý ońaı. Biz adal memleket quryp jatyrmyz, bul úderiste árbir adamnyń róli mańyzdy. Aıqyndyq, esep berýshilik, jarıalylyq – bul bizdiń basymdyqtarymyz". Qatysýshylardyń erekshe nazary, qyzmettiń qurmetti ardageri, Qazaqstan Respýblıkasy sybaılas jemqorlyqqa qarsy kúres agenttiginiń burynǵy basshysy, ómirlik jáne kásibı tájirıbesi mol azamat - Alık Shpekpaevtyń sózine aýdaryldy.
— Ózimizden bastamasaq, eshbir zań jumys istemeıdi. Árkim óz ornynda adal bolmaıynsha eshbir reforma nátıje bermeıdi. Memlekettegi tártip árqaısymyzdyń basymyz ben júregimizdegi tártipten bastalady. Ne isteseń de - bárin ar-ujdanmen iste, — dedi Alık Shpekpaev.
Kezdesýge qatysýshylar taqyryptyq beınematerıaldy kórip, naqty mysaldardy talqylady jáne baıandamashylarǵa suraqtar qoıdy. İs-shara shynaıy qyzyǵýshylyq pen ózara túsinistik jaǵdaıynda ótti, qatysýshylarǵa quqyqtyq jáne ádil qoǵam qurýdaǵy óz rólin túsinýge serpin berdi.