Bul shara WorldSkills International halyqaralyq standarttary negizinde uıymdastyryldy.
Chempıonattyń maqsaty – jumysshy mamandyqtardyń bedelin arttyrý jáne tehnıkalyq-kásiptik bilim alyp jatqan jastardyń kásibı daǵdysyn damytý.
Saıysqa qaladaǵy kolejderde oqıtyn stýdentter qatysyp, kásibı sheberligin túrli baǵyttar boıynsha kórsetedi.
Al baǵalaý úshin 250-den astam kásibı sarapshy men jumys berýshi tartyldy. Olar qatysýshylardyń tapsyrmalardy oryndaý sapasy men kásibı standarttarǵa sáıkestigin baǵalaıdy.
Jeńimpazdar 2025 jyldyń qarashasynda Astanada ótetin WorldSkills Kazakhstan-2025 respýblıkalyq chempıonatyna qatysý quqyǵyn alady. Sondaı-aq, qyrkúıekte Danıanyń Hernıng qalasynda ótetin EuroSkills Herning 2025 halyqaralyq chempıonatynda Qazaqstannyń namysyn qorǵaýǵa joldama alady. WorldSkills Almaty-2025 – jas mamandardyń qabiletin shyńdap, tájirıbe jınaıtyn jáne jańa múmkindikter ashatyn biregeı alań.
Aıta ketý kerek, bıylǵy chempıonattyń erekshelikteriniń biri – Almaty qalasynyń 9 jáne 11-synyp oqýshylary arnaıy shaqyryldy. Oqýshylar kásiptik baǵyt-baǵdar alyp, bolashaq mamandyǵyn durys tańdaýǵa múmkindik alady.
Ashylý saltanatyna Almaty qalasy ákiminiń orynbasary Ásem Núsipova jáne Almaty qalasy máslıhatynyń tóraǵasy Meıirjan Otynshıev qatysyp, jas mamandarǵa sáttilik tiledi.
«Memleket basshysy Qasym-Jomart Toqaev 2025 jyldy – Jumysshy mamandyqtar jyly dep jarıalady. Bul bastama elimizdiń ekonomıkasynyń negizin quraıtyn tehnıkalyq jáne kásiptik baǵyttaǵy mamandyqtarǵa kórsetilgen zor qoldaý men joǵary qurmettiń aıǵaǵy bolyp otyr. Osyǵan oraı, biz WorldSkills Almaty-2025 aımaqtyq chempıonatyn jańa formatta uıymdastyryp otyrmyz. Bıyl chempıonat aýqymy keńeıip, qatysýshylar sany artty. Chempıonatqa 53 quzyret, ıaǵnı mamandyq baǵyty boıynsha 350 jas maman qatysýda. Erteń chempıonat resmı túrde bastalady. Al birneshe kúnnen keıin biz elimizdiń eń iri megapolısi – Almaty qalasyndaǵy úzdik jas mamandardyń esimderin anyqtaımyz. Jeńimpaz atanǵan almatylyqtar Astanada ótetin WorldSkills Kazakhstan respýblıkalyq chempıonatynda baq synaıdy. Al eń úzdikterge halyqaralyq deńgeıde Qazaqstannyń namysyn qorǵaý múmkindigi beriledi. Chempıonat jyl saıyn zamanaýı jáne suranysqa ıe mamandardy daıarlaýdyń qozǵaýshy kúshine aınalyp keledi. Shaharymyzdyń chempıonatynda jańa juldyzdardyń janatynyna jáne olardyń jarqyn jeńisteriniń kýási bolatynymyzǵa kámil senemin», – dedi Almaty qalasy máslıhatynyń tóraǵasy Meıirjan Otynshıev.