165 jeńimpaz dıplomdarmen jáne aqshalaı sertıfıkattarmen marapattaldy
Almatyda WorldSkills Almaty 2023 VIII óńirlik chempıonatynyń jeńimpazdary men qatysýshylaryn resmı marapattaý rásimi ótti. Jarys qorytyndysy boıynsha júldeli oryndarǵa ıe bolǵan 165 jeńimpaz anyqtaldy. Olar Almaty qalasy ákiminiń orynbasary Ásem Núsipovanyń atynan jeńimpaz dıplomdarymen jáne aqshalaı syıaqy sertıfıkattarymen marapattaldy (1 oryn – 150 000 teńge, 2 oryn – 100 000 teńge, 3 oryn – 50 000 teńge). Sondaı-aq, júldegerler Almaty qalasynyń jetekshi kompanıalaryna kepildi jumysqa ornalasýǵa «altyn sertıfıkattar» aldy.
Aıta keterligi, bıyl chempıonatqa qatysýshylar sany men quzyretter sany ulǵaıdy. Eger 2022 jyly 51 quzyret boıynsha 350 jas maman qatyssa, 2023 jyly 53 quzyret boıynsha 380 maman qatysty. Jańalarynyń arasynda «Energıanyń jańaratyn kózderi» jáne «Jartylaı fabrıkattar jasaý» bar. WorldSkills chempıonatyn ótkizý – bul jyldamdyqqa arnalǵan báseke ǵana emes, sonymen qatar TjKB oqytý júıesindegi jańa ádisterdi anyqtaıtyn jáne kásiptik daıarlyq standarttaryn arttyratyn oryn bolyp tabylady.
«Búgin biz WorldSkills Almaty 2023 chempıonatynda úzdik stýdentterdi marapattaımyz. Almaty qalasynyń kolejderi taǵy da WorldSkills halyqaralyq qozǵalysyn damytýǵa beıindiligin kórsetti, al chempıonat alańdaryndaǵy qatysýshylardyń ózderi óz isiniń naǵyz kásipqoılary ekenin dáleldedi. Chempıonattyń maqtanyshy Deafskills baǵytyndaǵy saıyskerler boldy, olar bizge rýhtyń kúshi arqyly kez kelgen qıyndyqty jeńýge bolatynyn kórsetti. Chempıonattyń jeńimpazdary men júldegerlerin, sondaı-aq olardyń tálimgerlerin shyn júrekten quttyqtaımyn. Respýblıkalyq jáne halyqaralyq alańdarda únemi jeńister tileımin!» — dedi Almaty qalasy ákiminiń orynbasary Ásem Núsipova.
Eske salsaq, WorldSkills Almaty 2023 kásibı sheberlik chempıonatynyń basty maqsaty jumysshy mamandyqtarynyń bedelin arttyrý jáne sheberlik daǵdylaryn damytý bolyp tabylady. Baıqaýǵa qatysýshylar kelesi quzyretter boıynsha qala kolejderiniń 21 alańynda baq synasty:
- Grafıkalyq dızaın,
- kirpish qalaý,
- qurǵaq qurylys jáne sylaq jumystary,
- santehnıka jáne jylytý,
- keskindeme jáne sándik jumystar,
- Bızneske arnalǵan IT sheshimder,
- sandyq baǵdarlamalyq basqarylatyn stanoktardaǵy tokarlyq jumystar,
- CAD ınjenerlik grafıkasy,
- prototıpteý,
- Tońazytqysh jáne jeldetý tehnıkasyna qyzmet kórsetý,
- jeńil avtomobılderdi jóndeý jáne qyzmet kórsetý jáne t. b.
Bıylǵy jyly chempıonat jeti baǵyt boıynsha ótti, onyń ishinde bilim berý, óner jáne gýmanıtarlyq ǵylymdar, aqparattyq-kommýnıkasıalyq tehnologıalar, densaýlyq saqtaý jáne áleýmettik qamsyzdandyrý, ınjenerlik, óńdeý jáne qurylys salalary, qyzmet kórsetý salasy. Kolej stýdentteriniń sheberligin 500-den astam sarapshy baǵalady. Endi baıqaý jeńimpazdary 2023 jylǵy 24 maýsym men 26 maýsym aralyǵynda Astanada ótetin WorldSkills Kazakhstan 2023 respýblıkalyq chempıonatyna qatysady.
Jeńimpazdyń árbir medali kolejge upaı jınaıdy. Baıqaý qorytyndysy boıynsha Almaty memlekettik polıtehnıkalyq koleji 74 bal, Almaty qurylys-tehnıkalyq koleji – 49 bal, Almaty kópsalaly koleji – 40 bal, Almaty memlekettik energetıka jáne elektrondyq tehnologıalar koleji – 30 bal jáne Ortalyq Azıa tehnıkalyq-ekonomıkalyq koleji – 28 bal jınady.
Atap óterligi, is-shara «Sapaly bilim berý «Bilimdi ult» ulttyq jobasyn iske asyrý aıasynda jáne WorldSkills International quzyreti boıynsha WorldSkills Kazakhstan Ulttyq qozǵalysyn qoldaý maqsatynda iske asyryldy. Baıqaýǵa Almaty qalasy kolejderiniń stýdentteri, WSA chempıonatynyń bas sarapshylary, WS áleýmettik seriktesteri, Almatynyń jumys berýshileri qatysty