Yqylas atyndaǵy Halyq mýzykalyq aspaptar mýzeıinde Bere banda atty stýdenttik ujymnyń konserti ótti, dep habarlaıdy aqshamnews.kz
Kesh qonaqtary dástúrli vengr mýzykasyn tamashalady. Vengrıanyń Almatydaǵy Bas konsýly Sabolch Karoı Sóke myrza konsertte sóz sóılep:
«Qazaqstan men Vengrıany kóptegen nárse baılanystyrady. Bizdiń basty maqsatymyz – mádenı dástúrlerdi saqtaý jáne eki el arasyndaǵy dostyqty nyǵaıtý. Mýzykanttarymyzdy jyly qabyldap, júrekterińizde saqtańyzdar», – dedi.
Ansámbl músheleri vólta, lútnıa, elektrondyq klarnet, skrıpka, fleıta jáne akordeon aspaptarymen kameralyq kompozısıalar oryndady. Olardyń ónerin tyńdaýǵa ár jastaǵy adamdar, onyń ishinde Qurmanǵazy atyndaǵy Qazaq ulttyq konservatorıasy men Júrgenov atyndaǵy Qazaq ulttyq óner akademıasynyń stýdentteri men oqytýshylary keldi.
Kesh barysynda mýzykanttar tek konsert berip qana qoımaı, eski mýzykalyq aspaptardy qalpyna keltirý jaıly aıtyp, almatylyq áriptesterimen tájirıbe almasty. Sonymen qatar, jınalǵandar «Qazaqstannyń kóshpendileri: ótken jáne qazirgi» kórmesin uıymdastyrý máselelerin talqylady. Bul kórmeni Vengrıada ótkizý josparlanǵan, onyń maqsaty — elder arasyndaǵy tarıhı baılanystardy odan ári nyǵaıtý.
Qazirgi Vengrıa aýmaǵynda XIII ǵasyrdyń birinshi jartysynda Torǵaı dalasynan kóship barǵan qypshaq taıpalarynyń urpaqtary turady. Sondyqtan qazaqstandyq jáne vengr ǵalymdary ortaq tarıhı tamyrlardy zertteýge erekshe qyzyǵýshylyq tanytyp otyr. Bul baılanystardyń zamanaýı kýágeri retinde Býdapeshttegi Abaı eskertkishi men Astana kóshesiniń ashylýy aıtýǵa turarlyq.