Germanıa men Belgıanyń áskerı sarapshylar toby Raıymbek batyr atyndaǵy Almaty desanttyq-shabýyldaý brıgadasyna ınspeksıa júrgizdi.
Atalmysh sharalar senim men qaýipsizdikti nyǵaıtý sharalary boıynsha 2011 jylǵy Vena qujaty sheńberinde júzege asyryldy, dep habarlaıdy Almaty-akshamy.kz
QR Qorǵanys mınıstrligi Qarý-jaraqty baqylaý jáne ınspeksıalaýdy qamtamasyz etý ortalyǵynyń eýropalyq jáne strategıalyq qaýipsizdik sharttary men kelisimderin iske asyrý bóliminiń bastyǵy podpolkovnık Arnur Aqjigitov Qazaqstan qarý-jaraqty baqylaý salasyndaǵy halyqaralyq ózara is-qımylǵa qashanda belsendi jáne dáıekti túrde qatysatynyn jáne solaı bolyp qala beretinin atap ótti.
Brıfıń barysynda áskerı bólimniń komandıri podpolkovnık Danıar Karmanov brıgadanyń qurylý tarıhy, onyń mindetteri, maqsaty men quramy týraly aıtyp berdi.
Sheteldik sarapshylar barlyq sanattaǵy áskerı qyzmetshilerdi parashútpen sekirýge qalaı daıyndaıtynyn, qarý-jaraq pen júkterdi desanttaýdy qalaı iske asyratynyn kórip, qalalyq jerlerde urys júrgizýdi úıretý úderisimen tanysty.
Áskerı bólimniń aýmaǵyn tekserý jaýyngerlik tehnıkany, sport keshenin kórsetýden bastaldy. Sheteldik delegasıa ókilderine jaýyngerlik mashınalar parki, qarý-jaraq pen áskerı tehnıkany jóndeý sheberhanalary, oqý synyptary, áýe-desanttyq daıyndyq kesheni jáne áskerı qyzmetshilerdi qalalyq jaǵdaılarda is-qımylǵa úıretýge arnalǵan taktıkalyq qalashyq kórsetildi.
Odan ózge sheteldik ókilder kazarmaǵa, áskerı bólimniń asqanasyna jáne jaýyngerlik dańq murajaıyna baryp, qurmetti qonaqtar kitabyna qoltańba qaldyrdy.
Kezdesý sońynda áskerı ınspektorlar Qazaqstannyń qarý-jaraqty baqylaý salasyndaǵy halyqaralyq mindettemelerdi adal oryndaıtynyn rastady.